Item: 味鮮港式概念茶餐廳
Rating: 2
Author: 奧志雷

奧志雷

等級3

2016-06-06

離晒譜架，公司迫人地返大陸廠仲要過夜添，鬼死咁遠 ﹗前日 23 號下什上廠，琴日下午五點走，依家九點幾又再返廠，係深圳搭巴士都要三個鐘呀，吼 ﹗羅湖商業城嘆個麵餐降降火，食飽就要上路喇。

食埋早餐先搭巴士去海豐，遲都話之佢啦。路過見到間茶餐廳，求其啦。隨便望望個 menu，菜式都好雜喎，連燉湯都有，早餐都係提供大路穩陣野啦。港式概念，齋諗囉。

太陽蛋五香肉丁出前一丁配凍齋啡走甜，侍應小弟弟話太陽蛋要加錢喎、出前一丁要加錢喎、凍飲都要加錢喎，好無問題，隨便加。居然太陽蛋最先分開到，咁特別？堅係即煎喎，不過出前一丁要 10 分鐘之後先到囉，我習慣等齊全家影張合照先開餐架。

太陽蛋五香肉丁出前一丁，等左 10 分鐘既出前一丁居然唔夠熱，煙都唔煙下，只係暖暖地，而且麵質過腍又粉口，莫非係用暖水浸死個出前一丁？大陸唔識煮麵只係識泡麵？太陽蛋微暖，浸浸湯加熱後直送入口，蛋白滑蛋黃甘甜，滿意。

湯底淡而無味，出前一丁湯黎架喎？您地用幾多水去煮架？還是用隻大鑊煮一個麵呢？唯有嘗試落辣椒油睇下有無得救，好明顯係外購辣椒油，不香不辣，無味既？得油味。湯底溫度連五香肉丁凝固左既汁都溶唔到呀 ﹗可想而知個湯有幾熱呢。五香肉丁得幾粒肉仔，其餘全部肥膏食唔到，何解要倒咁多油落碗麵度呢？合埋眼是但倒晒落肚埋單閃，後會無期。