Item: 雞煲之家老店
Rating: 3
Author: 奧志雷

奧志雷

等級3

2016-06-07

樓高三層的雞煲飯店，一入到去我即要求坐二樓，地下環境擠迫又嘈吵！而且感覺好污糟。二樓雅坐好多了，坐窗門邊感覺較好，內部都是一般大陸格局啦，依度還算企理。雞煲之家都係朋友們介紹，陪朋友買完貨即刻黎醫肚，食飽返香港。

好肚餓，等左十幾分鐘仲未有得食？朋友仔黑晒面，火都黎，邊個夠膽餓親本女皇呀 ﹗雞煲再唔出現本女皇就燒您間舖，吼 ﹗望穿秋水，個雞煲終於都到喇，似乎細煲左少少喎，咁細煲既？點夠本女皇食呀，其他人唔準食 ﹗

辣椒撈大豆芽，餐前小食令我諗起韓國野。試試先，辣就唔覺辣，爽口但酸酸的，都係大陸人口味，但股酸味點黎呢？唔會壞左掛。唐生菜，生菜流血呀 ﹗似乎係廚房踐左幾滴血漬落菜度喎。食雞煲都有唐生菜送，多謝。好新鮮爽甜，係大陸菜真係特別靚、特別甜。

麻辣雞煲中辣，都要等一段時間先滾得起，最少十幾分鐘，都係叫住其他小菜食住先。等到差點瞓著，終於滾開出晒煙喇，等到呆左。撈混醬汁同香菜再兜兜佢，要煲多陣等材料出味先得，仲未食得。由等上菜再等滾已經半粒鐘，仲未食得呢！起動，熱騰騰放件雞件入口，中辣都唔太辣，仲甜甜地添，大陸雞都係偏瘦無咩肉，肉質嫩滑，雞味濃，好食！醬汁濃厚香甜，配料豐富，好滿意！再辣少少更好。

水煮黃鱔，我本身好鍾意食黃鱔，因為阿媽煮三絲炒黃鱔柳非常美味又勁彈牙！依碟水煮黃鱔跟食開既水煮菜色有點不同，唔見有大量辣椒同紅油密麻麻地蓋住，換來係辣椒渣、花椒渣、香料同辣油 ﹗紅卜卜顏色嚇人，但食落只油不辣，成口油，得個樣呢 ﹗

黃鱔質感尚可，腍劈劈，但我覺得阿媽煮既炒黃鱔好食百倍囉 ﹗質地炒到脆口又彈牙，我一定要學呀 ﹗大豆芽墊底，爽口多汁，好食過黃鱔添呀 ﹗整個水煮只係微暖，唔熱邊會好食架 ﹗

水煮田雞，賣相同辣汁跟水煮黃鱔完全唔同既？熱辣辣不過鑊氣欠奉，煙都唔煙下 ﹗田雞肉滑溜彈牙帶鮮味，堅新鮮好食 ﹗味道香口帶微辣又帶一點點甜味，配料中有萵筍同炒，萵筍翠綠又鮮甜多汁，炒得腍的話質感似瓜；炒得爽的話質感似筍。上年剛才發現此食材，香港都係近年興起，可能多左大陸人掛，好好味，打邊爐必備。

焗生蠔，menu 上張相片係有指天椒同蒜蓉架，侍應阿姐問洗唔洗加辣，我咪答唔洗囉，點知上檯時只有蒜蓉而無指天椒，比佢激死呀 ﹗我以為係指天椒再加辣呢。蒜蓉味非常香濃而突出，配埋鮮甜肥美生蠔同吃，熱騰騰十分滋味，有埋指天椒就好啦。好食好食，令到我有添食既衝動呀 ﹗仲要勁平囉，不過係大陸唔好食咁多生野喇，小心一點。

飽晒，好滿足。埋單都只係廿百幾人仔，價錢都好實惠，出品都合格。