喂！今日下昼三、四点几偷鸡溜咗出嚟宝安壹方城B2层，终于唔使排长龙试到呢间成日大排长龙嘅「肉肉大米」喇！平时听讲闲闲地等半粒钟以上，今次真系执到宝！间铺头仔细细，但成个装修系好舒服嘅木系风格，暖色调，坐低即刻有种放松嘅感觉。.讲到主角，梗系佢哋嘅牛肉汉堡排啦！我今次贪心，拣咗「两件原味 + 一件芝士」。哗！个芝士汉堡排嘅登场真系有晒仪式感！职员会先放块芝士片喺块扒上面，等佢喺铁板慢慢融化，再拎到你面前嘅热辣辣铁板度！第三件牛肉汉堡排佢哋会拎住一大旧芝士，即场喺你面前 「唰唰唰」刨落去！睇住啲芝士碎好似落雪咁铺满成块扒，仲要遇到热铁板即刻半融化... 未食已经流晒口水！.忍唔住一啖队落去！「哗！超级热！超级邪恶！」啲芝士多到黐线，咸香浓郁，包住𠮶件厚实又多汁嘅汉堡扒，口感超正！记得要戳穿𠮶只温泉蛋，啲蛋浆混埋啲热芝士同肉汁，捞埋啲饭一齐食... 哗，真系罪恶感爆棚但满足感仲爆棚！佢哋仲有几款酱汁可以点，我今次专心对付芝士，下次要试匀佢！.最抵赞系，佢哋嘅味噌汤、白饭同西兰花系免费任添㗎！食汉堡扒配饭真系一流，啲西兰花解腻又健康。重点系啲职员好醒目，成日主动行过嚟问：「需要加汤/饭/菜吗？」服务态度真系好好，加分！总结：「肉肉大米」个芝士汉堡排视觉同味觉都超有冲击力，热辣辣、芝味爆灯真系好过瘾！免费任添嘅汤饭菜绝对系大胃王福音，服务又贴心。温馨提示：真系 强烈建议避开饭市，好似我今次下昼茶时间嚟就爽YY，唔使排队直接开餐！为咗呢份邪恶嘅芝士快乐，值得嚟试吓！记住预留个胃啊！…查看更多
