打從90年代已經遊走於深圳，見證著深圳的成長，由16座小巴擠上20多人，1號公車沒空調，前後閘自由上落的日子，到今日地下鐵四通八達，的確方便得多。
當年最常找地方逛的方法，不外乎靠雙腳，又或者乾脆跳上公車，沿線找新景點，在不知前路下，有點尋幽探秘的感覺。
早幾年曾替OpenRice撰寫深圳專欄，但私務太忙，擱筆了好一段日子，伴隨深圳越見興旺，地下鐵更是縱橫交錯，每個出口都附有超大型商場，吃喝玩樂集於一身，加上24小時通關，以及出入境口岸增加，就算即日來回都可以玩得盡情。
筆者本身在facebook群組的《深圳美食玩樂團（更新版）》，更是在通關後，短短四個月內，由不足四萬，躍升至17萬谷友，可見大家都習慣了北上消費娛樂。
今次就找來幾間點心店，看看水準如何，或者每個人對食物的標準不同，各網媒亦有自己觀點，自己以平常心看待，當中有新有舊，有驚喜亦有失望。
率先上場是位於國貿頂樓的旋轉餐廳。
可能大家已習慣了在鐵路沿線找新食點，個個都係深圳專家，此類舊式酒樓已逐漸被人遺忘，但我講一句，國貿旋轉餐廳依然有可取的地方。
昔日鄧領導人南巡，係餐廳發表“南方談話”，令深圳開始飛躍發展，家陣仲保留了當日發表講話的房間，除了具有歷史背景外，因為防火原因，在幾十高樓層而批准用明火煮食的，聽說全國只此一家，夠厲害了吧
就算是道聽途說，能在不同時間遠眺周邊景色也是不錯。
就算是道聽途說，能在不同時間遠眺周邊景色也是不錯。
在疫情前，曾分享過一次點心體驗，當時是一個價錢任食，但因為太過浪費，現在已改回單點收費，不過今日重臨，餐廳裝修過後，收費實在幾進取，比香港貴很多，相信一部分是景觀費吧！
其實轉一圈要70分鐘左右，差不多是一餐茶的時間。
今時今日茶位已不便宜，一壺武夷山大紅袍（$15/位）盛惠人仔$15，算起來近$20港幣。
旋宮蝦餃皇（$52）是必點的菜色，餃皮搓得水準內，柔韌性未夠，但蝦肉沒太多人工化，筍尖亦帶出鮮味，可說是今次實測中比較令人滿意的。
至於柱候蒸金錢肚（$49），不單賣相靚仔，入味有嚼口，特意叫了一碟辣椒油，看來是自家製，因為加入了豆豉、蒜茸及辣椒籽，辣中帶香，令金錢肚更惹味。
雖然是屬於舊派酒樓，但注入了年輕元素，咖喱牛肉菠蘿包（$39）及雞仔咸水角（$26），賣相已有板有眼，但味道尚有進步空間。
但有一點想講，旋轉餐廳係無腸粉提供，作為飲早茶的地方，居然腸粉欠奉，實在匪夷所思。
連茶位埋單超過$220港幣，但服務同環境都要歸入成本中，是日飲茶的多是本地人，但想要靠窗位都等了超過半小時。
另一間是慕名而來的陶陶居。
今日茶錢平一半鐵觀音（$8/位），但飲落甘甜醇香，不錯。
今次選來海岸城店，陶陶居大蝦餃（$35），個人覺得一籠只得三件是取巧加價的做法，論外形有點吊詭，說是半月餃子又不像，但邊位摺紋又十足，手法可說別樹一幟，蝦肉淡而無味，但質地是爽彈的，作價要$35人仔，差不多近$15港紙一粒，係香港有好多好選擇。
國貿旋轉餐廳無腸粉，但有亦未必好，鮮蝦韮黃滑蛋腸（$35），腸粉睇落好似一早拉好放入蒸爐保溫，腸粉皮收縮又欠香氣，腸粉表面有倒汗水，蝦肉死實，滑蛋好“嚡”，完全失敗。
至於傳統炆牛雜（$35），又真係炆得夠稔同入味，尤其是置底蘿蔔更屬必搶食物。
炸物就選來芒果鮮蝦春卷（$32），賣相幾取分，但炸得未透，外層沒有脆香的口感，芫荽勁重手，只有芒果的甜與芫荽的香，蝦味及口感只能憑空想像。
整餐最滿意反而係順德煎藕餅（$52），刴碎的蓮藕與肉餅拌均，煎得雖然有些少油膩，但吃得出蓮藕的爽勁與肉香，用來伴飯更是一流。
兩位用埋單人仔$205，雖然較便宜，但質素是低處未算低，總有人墊底。
譽八仙
對上一次來萬象天地，其實好多餐廳未開，今次算是疫情後初訪，感覺是人流多了，除了五樓的餐廳及 food court 外，六樓盡是大型的餐館。
譽八仙可說是近日較受歡迎的菜館，午間時段亦是以廣東式飲茶為主。
雖然是平日的下午近一時半過後，理論上已避開上班族的用膳時間，但依然要等位，可見幾受歡迎，而且等位逾一小時，會送上小菜一碟，既不得失客人，又可以用承諾加固客人信心，更進一步係可以留客，都幾聰明的舉措。
餐廳裝潢盡量流露出古樸風，但個人覺得過於刻意，而且檯與檯之間都幾逼下，當然，閣下亦可選擇廂房。
茶單是寫在大紅紙扇，看前面價單都是人民幣$10起跳，都幾合理，但翻看另一面，卻是加多個零，拾位變百位，果然有驚喜。
今次挑了洞庭碧螺春（$16），雖然並非上品，但入口尚算醇香，已經不錯。
係菜單中竟然有魚翅灌湯餃（$38），香港已經少見，係深圳更加屬恐龍級別，無疑賣相仲可以好些少，將鐵片拎上手，餃皮絲毫無損，超水準表現，拉開兩半，發覺內裡真的是清湯，但吃得出並非豬皮凍，魚翅份量稀少是意料中事，冬菇及蝦仁切得細碎，唯一挑剔是平白加入蟹柳，有點不倫不類，但有得食已經有驚喜。
陶陶居的惡夢下，想找回人生是美好的，爽滑鮮蝦腸（$32），很奇怪，食慣了鮮蝦腸加入韭黃，深圳有時會用上露筍粒，又或是生菜、菜芯之類，今次是豆角，色澤上是添了色彩，但口感卻是怪怪的，其實個人覺得最佳配搭依然係韭黃。
腸粉拉得柔韌超彈性，童心未泯下，用筷子穿起，足足成分鐘都沒有破損，厲害。
至於蝦肉是爽彈的，但蝦味不足，不過都好過另一間名店醃到嗆喉。
個人始終喜歡蝦餃，押上店名的譽八仙蝦餃（$32），其實正正常常，蝦肉爽口彈牙，但味道稍淡，不過不失。
炸物是懷舊咸水角（$26/3件）單看色澤是稍微過火，但幸好油份尚可接受。
有說一餐飯總要有甜品先算完美，薑汁雙皮奶（$26）質地是滑的，但薑味若有若無，其實可以重手些小。
今次埋單人仔$170，看來深圳的消費已貼近香港，其實真係好懷念當年車公廟站上蓋的金悅軒，服務、環境、食物水準比頂級酒店中菜廳不遑多讓，但早幾年已結業了，真可惜。
人生總會中一次伏，今次選來五間中菜館，鳳凰樓可說是污點。
先講下軟件，同內地大多數餐廳一樣服務好，但冷氣不足。
至於食物，只能用惡夢形容。
茶位基本上$10起跳，絕大部分是$16，今次選來了陳年普洱。
開水是另用銅壺保溫，沖泡茶時熱燙，最啱要求水滾茶靚的茶客。
萬千頭緒，就由鳳凰焗餐包（$7/件，兩件起）說起。
外表飽滿，包質鬆軟，餡料是芋頭及粟米，但咬落內裡空盪盪，唉！
至於鮮蝦炸雲吞（$9/件，兩件起），雖然炸色澤金較深，但不覺夾雜異味，至少並非用千年油去炸，但實在好油，一咬開油份溢出，置底紙整張盡是油份，太過份了吧？
又係蝦餃時間，水晶鮮露筍蒸蝦餃（$12/件，兩件起），感覺大而無當，體形比傳統蝦餃大了三份之一，摺紋係有10摺以上，其實係等同穿上大碼衫，沒有漲滿的賣相，蝦肉醃得爽彈，但過了火，食落感覺嗆喉。
而鮮蝦蒸燒賣（$33）又係好大粒，肉覺鮮，蝦仁之前講，是醃得過了火，有點過猶不及的感覺。
其實拉腸粉的漿粉比例，各有不同，看師傅的心恩，四式腸粉皇（$40）腸粉皮拉得好薄同滑，四式是牛肉、什菌、鮮蝦及叉燒，排列工整，算是令人接受到。
到了黑椒蒸爽肚（$36）。香港一般豬肚多數用在胡椒豬肚湯上，今次一碟得四、五片豬肚，置底是大量洋蔥絲，熟透了的洋蔥甜甜地又幾惹味，但豬肚份量似乎偏小，作價要$36人仔，實在好進取，如非必要，可以不理。
基本上點了六款點心，但凡涉及蝦類都醃得過了火，而且件頭大，蝦餃及燒賣比平日港式大了4份之一，可以點兩件亦算靈活。
論裝潢及服務，感覺上比以前優勝，但食物水準卻下滑得令人卻步。
洗手間有驚喜，提供一次性座墊，夠衛生，亦不覺強烈異味。
回憶總是美好，轉眼間都出入十多年了，鳳凰樓依然屹立不倒，看來有不少忠粉在支撐著。
埋單要$199.1，如是會員$190.3，但機會已給，相信沒有下次了。
壓軸的餐廳是通關後大熱，與華強蘩樓最多人提的匠傳點心（萬象城金威大廈店）。
靠窗的桌上附有水喉，沖水加熱不假外求，陳年熟普洱（$8/位）亦醇厚幽香，$8一位亦算合理。
朋友二話不說就點了名物匠傳參湯鮮蝦餃皇（$45）。
說穿了，其實是在基本的蝦餃上注入蟲草花花旗參湯，個人認為是多此一舉，平日用湯泡浸餃皮，又不見得味道昇華，餃皮變稔了，仲要比多$10，為乜？倒不如乾脆來碗湯飲仲好。
簡簡單單的水晶蝦餃皇（$35）反而討好，餃皮搓得柔韌有彈性，摺紋亦超過10摺，蝦肉爽彈，食落有鮮香的感覺。
而韭黃鮮蝦腸（$39）的腸粉皮是中規中矩，質地未至於鬆散，但又不覺柔彈，但餡料及醬油又幾好。
炸物類是韭菜蝦餅（$29），老實說是有點驚喜，韭菜與蝦肉比例恰到好處，壓成薄片令水份不會過多，食落非常香口及脆卜卜，配上濃普洱更是絕配。
友人是內臟怪，見牛雜貴得離奇，只選黑椒蒸脆腸（$29），講真，又的確超好食，夠入味，肉質爽脆，真心推介。
但乾炒牛河（$35）又出事，大量洋蔥及蔥段，結果是水份過多，河粉好濕身，個人亦不喜歡加上芝麻，牛肉鬆軟，肉味稍淡，但只$35，等於點心價錢，可以接受。
埋單人仔$228，好處是有夜茶。
暫時去過五間餐廳，有新有舊，但找不回昔日金悅軒的水準，可能回憶總是美好的。