Item: 東方園國際美食水療會
Rating: 3
Author: 奧志雷

奧志雷

等級3

2016-05-09

已經係晏晝三點幾，要快快起身叫早餐，VIP 房要四點半退呢，好鬼趕呀 ﹗

香煎銀鱈魚，唔係掛？咸到不得了 ﹗到底係咸魚？定係馬介休呀？刀功仲好了得，切得勁薄喎，從來未見過煎銀鱈魚搞成咁樣。麻辣炒豬肚，辣就唔係好辣，不過不失啦，但咪又係唔夠熱囉，係餐廳?到黎 VIP 房凍左喇，扣晒分。

招牌跳舞雞，自從每次都訂 VIP 房，而每次隻雞由廚房送到上黎都已經唔熱啦，一唔夠熱就會開始油膩又唔夠香口，下次都係落返餐廳食新鮮出爐熱辣辣既跳舞雞喇。依家都皮香肉嫩既，最衰只係暖暖地。

黑椒牛肉骨鍋，唯一一個夠晒熱既菜，出住煙送到，好正呀 ﹗雖然係中式牛肉，醃過又鬆過，不正常地好鬼腍，不過味道真係唔錯，個黑椒汁又打得幾好，香辣滑有齊，Good ﹗好味道。

豉椒炒豬腸，有驚喜 ﹗豬腸非常脆口，炒得惹味，好食好食，比豬肚更好，又係衰唔熱囉。燉花膠螺肉湯，依個真係無得頂呀 ﹗隨左個牛仔骨煲係熱辣辣外，依個湯都出晒煙架 ﹗好好味 ﹗大陸既湯堅好味又足料，花膠同螺肉都好好食 ﹗九十蚊物有所值 ﹗最先想叫蟲草湯架，但要二百幾蚊人民幣呢 ﹗怕朋友仔厭貴得濟，點知最後仲有七百幾蚊先夠最低消費呢 ﹗

海鮮粥，什麼海鮮粥呢？個窩頭盔咁大，淨白粥底要百幾蚊，再另加海鮮，我地加一隻蟹已經要百幾蚊人民幣喇 ﹗依兜咁野要差不多三百蚊，咁多次食最搵笨係依個粥 ﹗侍應仲話四人份量，睇黎成圍先食得晒囉 ﹗而且又難食，口感似糯米粥又似珍珠米，好厚好黏，杰撻撻。好重花生油味，油膩感非常重，無其他味道，亦無蟹味 ﹗雖然隻蟹唔係好大隻，不過真係勁多膏，個個咁客氣，個蟹蓋等我解決啦，哈哈 ﹗蟹膏勁香甜，好采都有一點安忍慰。

個中英對照既 menu 真係超有娛樂性呀 ﹗我真係睇到愛不釋手，好鬼正 ﹗同上次澳門酒店既雙頭鮑 two heads abalone 有得揮，有過之而無不及 ﹗龍蝦 dragon shrimp、縮骨魚 shrink bone fish、生腸 raw sausage、水魚 water fish、膏蟹 lamb and crab ﹗笑到收唔到聲，嘩哈哈 ﹗

原來銀鱈魚叫做 silver snow fish，真係得啖笑，哈哈 ﹗Trademark dancing chicken？真係招牌跳舞雞？堅係笑爆咀，不過依個譯得正常。Ganoderma lucidum？依個深鬼到呢，我都唔知點解，要查查字典先得。靈芝屬清明的嗎？咩春春黎架？後面仲要 turtle strew？海龜鏍絲？滴晒汗。

總之任何腸都係叫做 sausage 啦，華哈哈 ﹗豬腸粉係咪叫做 pig sausage powder 呢？正如熱狗係 hot dog 囉，笑都腸都痛。menu 會印埋卡路里，有部份仲寫埋食療功效添，真係有 heart，但係好假又好搞笑囉，可信性極低。勁有趣既英文 menu，好搞笑 ﹗返到大陸我最鍾意就係睇 menu 架喇，好有創意。