订咗晚黑7点半，佢叫我7点45分前去到就可以，果日啱好系星期五，我哋去到都唔系好多人
仲有好多张台可以选择添，不过坐低觉得空调唔够，闷热闷热嘅感觉，后来坐耐咗仲好小小
一共系8个菜，有4位茶，我哋5个人去加多一位茶，要4蚊！
佢话酸梅猪手卖晒啦，换个拆骨猪手被我哋，开头唔知就话好啦，后来睇先知呢个系特价菜，只需3蚊
不过拆骨猪手都几好食嘅，辣辣哋咁，虽然卖相麻麻哋，因为拆到乱七八糟，而且好多都系骨
其实就好似一个凉拌菜咁，上面有青瓜，有花生，有白芝麻捞成，仲有麻油味，辣辣哋我爱
一个系鱿鱼黄鳝煲，煲好大，里面料好小，而且汁太黑，好似系度食紧锅捞咁，除咗咸食唔出咩味
鲜味都被啲汁盖过晒，食唔出鳝同鱿鱼原先嘅鲜味，有啲啲失败！
时蔬系上汤芥菜，菜都算新鲜，唔会整到好淋，味道调得唔错，几好下
菠萝包系招牌菜啦，不过我个人觉得麻麻，食落去好似有啲苦，而且菠萝味都唔似系新鲜嘅
最好饮嘅就系杏汁白肺汤喇，茸茸绵绵嘅口感真系好正，对男女都好啊呢个汤，一盅可以5个人饮啦
鸡呢就一般般啦，觉得唔够新鲜，就咸咸哋咁，后来都要打包呢
黄鳝饭好食啊，不过佢哋话食一下就漏喉喔！我觉得唔错啊！系黄鳝少咗啲之外，话晒系招牌啊嘛
依家佢哋好多打折活动，例如日日都有特价菜，用咩银行卡又食几多减几多咁，都几抵食架
