晚饭经过禹山路，见到呢间新开嘅店，店装修好似唔错，仲有姐姐仔喺度派传单添
于是入去试一试啦~一楼位置唔系好多，估计有5张台度吧
二楼比较大，应该可以坐几十人，装修都还新净，虽然唔系好精致
打开佢哋嘅manu..发现佢菜式系抄袭萨莉亚嘅,风格菜式咁都好似~走嘅都系平价路线
我哋要咗一个吉列虾鸡扒,一个芝士焗西兰花,田园香辣意粉同吉列炸鸡柳
两杯畅饮,7蚊一杯,不过服务员话畅饮机未到,依家只喺得可乐同雪碧,可以续杯咁话
吉列虾鸡扒22蚊,分量真系细到冇朋友,好似儿童餐咁,仲要22蚊,同萨莉亚冇得比啊,好唔抵,我同家姐望住呢碟嘢,只能用无语嚟形容,吉列虾味道都唔错嘅,可惜分量...
芝士焗西兰花12蚊,还是好精致嘅分量,味道一般般,面头啲汁唔知系咪落得多生粉,好粘,特别食到后来就痴住痴住,而且芝士味冇乜...
田园香辣意粉11蚊,分量都算可以对比起价钱,有啲辣辣哋,好开胃,比较中意呢个菜式
吉列炸鸡柳12蚊,有泰式辣酱同番茄酱可以俾你点,脆脆咁,炸到金黄,都唔错!!
畅饮我哋都冇续杯,因为可选性太少,买单71蚊...服务员态度唔错,几亲切~
