以前好旺，次次都要等位，且大厅好多烟民，比较吵杂，非吸烟区比较细。
有段时间冇去了，依家已经扩大咗面积，就餐环境好咗，亦唔使好似以前咁下下都要等位了。
出品水准都算系保持稳定，价钱升幅唔算大，家阵虾饺做特价，10蚊4只好抵食~
泰汁腐皮卷~几乎次次都点嘅，个头比以前缩水咗，好在口感味道冇变，都系咁酥脆，点泰汁酸酸甜甜仲带些微辣，好好食。
虾饺~10蚊特价，个头却唔细，里面嘅虾虽然唔算大只，但胜在新鲜，冇泡发过度，味道唔错，性价比高几乎每张枱必点嘅。
水牛奶蛋挞~挞皮几酥化，挞馅似双皮奶，雪白嫩滑，如果再大只啲就更正了。
虾米XO酱炒猪肠粉~分量都唔细，虾米比预期嘅要多得多，咸鲜惹味，XO酱带些少辣，猪肠粉爽滑，炒得唔错。
生菜骨腩粥~粥都算几鲜甜，够绵滑，骨腩切得比较细件，肉都唔少嘅。
榴莲班戟~里面榴莲馅唔够多，鲜奶油就灰常多，有啲腻啊。
依家地方大咗，环境亦靓咗，起码唔使等位，得闲过开依边都会继续帮衬，多啲人点炒餸都好，碟头几大嘅，仲有好多特价菜式。
