5月尾有幾日連續假期，因為想去呢間Line Cafe一段時間，所以紅日當日我地就北上食野、揼骨。
自問唔係熊大粉絲，但呢間Line Cafe都幾值得去呢，女孩子鐘意影下相、打卡，都應該會鐘意。如果係粉絲，就更加唔洗講啦，起碼唔洗搭飛機去韓國
Line Cafe都幾大，場內場外都有好多Line擺設，好多影相位，就算唔食野，都可以入內影相或者購物
餐牌選擇都算多，價格比平時大陸食野點都高少少，始終係主題餐廳。但比起香港嘅主題餐廳，其實已經唔算特別貴，而且味道比想像中好。
供應有輕食、甜品、沙律、熱狗 (RMB¥30) 、披薩 (RMB¥55)、意粉、飯、小食等。平日黎仲有午餐、下午茶，可惜當日係週六~
餐廳採用自助形式，客人喺收銀處點單，牌子振動後自行取餐，自行搵位。
不過並唔係個個入黎都會食野，加上位置不少，其實都唔需要特別等候或者排隊。
海鮮蕃茄意麵 RMB¥58
意粉份量唔算多，一人剛好，裡面有兩隻蝦、青口，配上半塊印有熊大臉嘅麵包。
意粉掛滿醬汁，較為粗身，煮得略腍，蕃茄醬味道香濃，唔會太酸，蝦、青口不過不失啦，食落唔臭唔霉。
麵包烘過，唔係平日食嘅多士，偏硬身，咬落「確確聲」。
甜品方面一律供應3款造型，分別係熊大、莎莉、兔兔，韓國基本上都係呢啲款式，如果約多幾個朋友黎，可以試多幾款呢！
布丁奶凍 RMB¥48
揀左兔兔造型，代表草莓口味。奶凍都幾大件，而且真係幾可愛嘅，少女上身。
底層係蛋糕，濕濕笠笠，中間係草莓醬夾心，味道唔明顯，酸酸甜甜。
奶凍較挺身，有別於平時香港嘅布丁/奶凍，有慕絲口感，食完會有飽滯感。好好食就真係稱唔上，但唔係伏
鮮奶冰淇淋 RMB¥23
文案話係來自韓國，真正嘅鮮奶冰淇淋，我揀嘅係熊大杯。呢杯實物並冇圖片睇起上黎咁堅挺，但味道好接近。
雪糕溶點非常低，影相要快，食落奶味香濃，質地唔係好滑身嗰種，面頭有一塊小曲奇，整體係幾好食
奶蓋伯爵茶 (忘記實際價錢，大約係RMB¥32)
奶蓋滑身，伯爵茶味道突出，個人認為味道不錯。
奶油布丁 RMB¥28
草莓酸奶杯 RMB¥25
奶油布丁面頭一層焦糖漿，甜度超高
而且布丁質地較實，奶味唔重，味道一般加上樽口頗深，用即棄匙更唔太方便食用。酸奶杯相對甜度低點，但都唔好食得去邊，類似美心出嗰啲布丁杯。草莓醬酸都眼都打唔開，酸奶質地似慕絲，混合食可以接受，裡頭加有草莓粒，幾新鮮。
以主題餐廳而言，食物都合格，相對平時國內消費，呢度頗高，要食飽飽嘅話人均過百，不過作為老左嘅少女，黎到都好開心，不停影相
