悦show贡丸's Profile

晚上响度食噶火锅，觉得食材都算比较新鲜噶，特别系虾上到来仲生勾勾噶跳下跳下，一份有7，8只咁多涮熟食好鲜甜，肥牛虽然话十几蚊一碟，但只得几片，而且好薄。其他点噶譬如冬瓜，生菜，淮山都系细细份，素菜大部分都系几蚊鸡一份。锅底话就话系猪骨汤但食唔出肉味，连骨头都冇。火锅面一份一块，几襟煮，严重怀疑系咪加咗咩化学嘢。虽然睇上去食噶嘢都几靓，但除咗虾同肥牛好味道点，其他都麻麻地，面都无食完。煮咗好耐仲系韧韧地，唔敢食噶啦。酱料同饮料系要另外俾钱噶。饮料单杯3-5蚊，交7蚊可以畅饮三种。都系色素水整出来噶野，宁愿饮白滚水好过，虽然每样嘢一份价钱唔贵，但份量细所以要点多几样先够食。服务员少，不过餐厅细，有时问咗服务员直头自己去摞仲好过等服务员。…Read More

听闻呢间酸菜鱼几好食，今日中午去试咗，的确唔错。我地12点几去到都仲有位，环境都算得唔错，有包间，我地坐噶系大厅，大厅茶位3蚊。 酸菜鱼48蚊一份，好"大盆",睇表面好似肉唔多，其实好多响下底，酸菜唔咸反而有小小酸甜味，鱼肉食落口觉得好新鲜，而且色水都好靓。2个人食埋呢盆嘢都差唔多饱啦，黑米饼薄薄地，微甜，4蚊一个，食咗2个，又点咗3个打包带走。菜价方面有平有贵，丰俭由人。选择余地都几大噶，虽然以湘菜为主，但酸菜鱼觉得一D都唔辣。服务一般般，服务员一个二个无晒表情咁，唔会主动帮客人加水，要叫距先得。…Read More

呢间响天河时尚里边众多噶食肆中最明显噶标志就系门前有两个卡通公仔，餐厅可能系同游戏公司合作噶，店里度度亦都可见公仔。店员比较热情，态度非常好。 我地入去噶时候就得店员冇其他客，过咗半个钟头先有三三两两噶客，貌似生意并唔多旺。食噶系水果松饼，28蚊一份，有D出乎意料，好大份。有四件咁多。而且配咗红豆椰果，奶油朱古力酱，好丰富。食又唔会话好甜，如果饼再软D就更加完美啦。一般西餐厅好少有咁大份量噶出品，呢个实属难得啦。走果时仲送咗张10蚊噶抵用券，下次来食系无限制使用噶。环境卫生呢D都几好。有免费WIFI …Read More

经过距地门口撞到当日特价只需9蚊就可以享原价29蚊一杯噶雪盖乌龙茶，虽然并唔多中意饮茶，但睇到咁有着数而且街招上噶宣传画都几靓几有吸引力，于是都埋到去，服务员比较热情会介绍其他噶品种俾客人做选择，除咗茶饮，仲有蛋糕甜点切件，价格都二十蚊左右细细件。 特价噶雪盖乌龙茶，特别主要系茶噶上面覆盖住层奶油，下边噶乌龙茶并唔多特别，就系乌龙茶水，茶味几浓小小甜味，咁样一杯原价29蚊的确觉得好离谱。特价9蚊都觉得唔平。好彩系特价饮噶。正价都系算把啦。…Read More

呢间都算系食环境噶地方，门口荷叶莲花，蝴蝶呢D装修得几有江南风情，但餐厅里面又有点西餐厅噶风格，大部分系卡座来噶，或许下昼时间人少D，好多空位噶。 食噶灌汤包入边噶肉汁鲜甜，食多几个都唔会觉得漏，可惜一笼得四只，而且个头比较细。鸡毛菜炒香干，服务员话鸡毛菜系杭州空运来噶，算系江南特产。睇落系有D特别，菜好幼嫩，食落口好清爽，香干都食得出小小酱香味。东坡肉上来系四四方方已旧来噶，服务员当面戴住一次性手袜用消毒过噶铰剪剪开，下边垫住新鲜笋干，肉味甜糯，睇住肥腻食入口就唔觉。非常唔错。虽然每样菜价钱偏贵，但出品同服务都比较好。间中来试下都唔错。…Read More

我地系逛完海心沙揾到呢度来食噶，谂唔到近住海心沙噶高德置地大厦噶下边有咁大间噶美食区，都系新开无几耐噶，呢间好显眼，门面睇落去就几中意，金碧辉煌噶好有异域FEEL. 店里光线有D暗同西餐厅有小小似，但风格截然不同，色彩斑斓噶，好有情调。点噶鲜虾纸米卷，咖喱牛腩煲，煎蚬蛋。鲜虾纸米卷出品最靓，一份六卷，外表系青碧碧噶生菜，中间系虾同米饭芝麻，入口鲜香好好食。牛腩煲牛腩有浓浓噶咖喱味，唔系太林，人边噶薯仔椰菜都几好食。牛腩煲系配法包噶，用法包捞汁口感几好。蚬蛋食唔到几个蚬，大部分系蛋来噶，味道比较重。 原以为咁靓噶餐厅出品都系好“精致迷你”噶，但事实上都算大份，而且来到呢度未食嘢环境就留俾人好好印象，唔错，有机会再来过。…Read More

一进门马上就有服务员贴身服务呢点抵赞。店里位置摆放比较密，墙上挂住好多旧上海式噶美女相，有小小怀旧感，餐牌上求求其其都二三十蚊以上噶价钱，有噶甜品一份高达六七十蚊，令人乍舌！我地两个拣平D噶点咗芒果糯米卷同芒果黑白凉粉，分别系25蚊同27蚊。食完觉得都系糯米卷好食D，糯米卷有四条外皮晶莹透明里面包住芒果肉，馅料清甜，外皮滑爽。芒果黑白凉粉份量大过糯米卷，但味道好普通，而且黑白凉粉都系经常食到噶嘢，唔够糯米卷有新奇感，价钱仲有贵多2蚊添。店里有食够29蚊可以最低加8蚊噶套餐，但同出边其他甜品铺比就算优惠咗性价比都唔高。WIFI上网睇电影唔卡，抵赞。…Read More

去过沙河粉村噶几间分店，算呢个环境最好，乜都好新净，我地系下昼点几钟去到，好少食客啦已经。一人一碗牛肉丸粉，18蚊一碗，觉得价钱都几贵下噶，但响万达广场呢笪地来讲算比较大众化噶价钱，虽然食肆都唔少，但价钱都唔会平过闹市。 装粉噶碗够大，似个盆仔咁，河粉量一般，口感唔错，爽滑而且薄薄地，汤底比较鲜。牛肉丸应该系手打果种呱，几弹牙爽脆。 服务员多过食客，态度还可以。…Read More

餐厅比较残旧而且位置有D偏僻，如果对环境要求比较高噶朋友呢度可以直头忽略啦，因为我地都系团购先来食噶，前一日电话约好中午12点噶，惊到时冇位11点9就到噶啦。团购78蚊5样菜加半打生肉包，套餐冇饭，3人又点多三碗饭，其实食到后尾饭有D多余，因为菜量唔少，特别琵琶鸭几乎剩低大半，主要系味道唔系好，偏咸，而且肉噶口感有嚼橡皮糖噶感觉。泰汁茄子几好食，茄子油炸过噶，甜甜辣辣噶。脆皮咕噜肉都系甜甜酸酸噶味道，外脆里嫩，生肉包啱好一人2只，入边料几足，味道都几好。呢个四人餐我地三个人去食噶，食得几饱，味道除咗鸭咸咗，其他都唔错，四人来食噶话都够食噶。冇缩水，而且服务态度方面都几好。…Read More

呢间新开噶，而且经常行经距噶门口都几有印象，发现团购都有埋距噶，于是团咗去食，比较好噶系唔用预约，随到随食。毕竟新张来噶，所以人客比较少。原来系准备打包拧返去食噶，而且开始果个店员都同意咗，但另外一个出来话团购唔打得包，只限堂食。我话团购详情里边冇呢个规定喔，距又话打包可以不过要加多五蚊噶打包费，算啦，费事同距争，堂食咪堂食咯。出品时间有D耐，披萨要噶系海底总动员披萨，其实就系海鲜披萨，有虾，鱿鱼呢D，芝士唔够多，趁热食味道还可以，烤鸡翅都热辣辣出炉，甜甜地。49蚊噶团购来讲，有10寸咁大噶披萨加甜点小食都算几抵食噶。两人食啱好。环境好特别，墙壁都贴住好多树皮咁，几得意！就脚噶话试下无妨。…Read More

同舅父一家人来呢间食噶晚餐，餐厅有二层都几大噶，7点半钟地下坐得差唔多满晒，我地楼上食噶，楼上疏好多。店门口养住家禽同海鲜之类噶嘢俾客人买来现劏现煮，菜牌睇上去菜品都几丰富，而且特价菜都唔少，5个人点咗6样菜，每样菜碟头度唔细，最好食噶系山泉水蒸鲩鱼，鱼肉质非常之鲜美，而且肉唔会松散，好实。39蚊一条真够晒平，盐焗鸡半只48蚊，系唔系门口养住果D就未知，不过食起身都几入味，而且皮薄肉滑。虫草花炖瘦肉味道都过得去，有小小甜，加咗杞子红枣姜片淮山几种嘢，几足料。味道来讲冇咩特别难食噶，基本都算满意，不过服务就差咗D，经常叫唔到人，最让人接受唔到噶系咁大餐厅竟然冇WIFI上网。 …Read More

隔离就系好又多超市，人流好密。但餐厅里面环境算好噶，虽然中午就餐人都唔少，但并唔会话同出边一样好吵，而且服务员态度都几好，算系礼貌待客啦。 发现消失咗一段时间噶39蚊超值装披萨又重出“江湖”啦。食噶系意式飘香肉丸披萨，9寸，加杯奶茶9蚊。披萨虽然唔大，但一个人食系最够啦，而且饮埋奶茶，都好有饱腹感。披萨里噶肉丸好爽口，而且披萨落噶芝士几足，够香鲜。奶茶比较普通，就系一般噶奶茶味道。 必胜客噶价钱系人都知噶啦，比较贵，呢个39蚊噶披萨算系最超值噶啦。而且唔堂食可以直头打包拧走噶，不过趁热先好食噶喔。…Read More

位置近住江南西噶广百新一城，大排档噶形式，下昼六点几去，仲有大把位，同老友记点咗虾蟹粥，烤茄子，蒜蓉西兰花。粥系当面现煲噶，虾蟹粥双人份有2只蟹，虾有七八条咁多，唔系好大只。不过够新鲜，粥绵滑鲜甜，加咗中意噶香菜，十分之好味。烤茄子蒜蓉落得好多，味道有D重，不过够晒林。都算唔错。西兰花够大份，口感爽脆。比较好噶系店里做粥噶食材都系用那透明雪柜装住，新鲜看得见，即点即整。而且价钱都唔比较大众化，值得帮衬。 …Read More

响楼上噶影城睇完电影落来见到呢间，同朋友一齐入来饮杯嘢。环境几优雅，应该开张冇几耐，装修显得几新净。一入到来就feel到店员噶热情，一个二个都好有礼貌。 点咗榛果精华同秋水伊人两杯，分别系18蚊同22蚊，中杯来噶。朋友饮个榛果精华咖啡一上到来就闻到好香。我饮噶秋水伊人咖啡里面噶奶味比较浓。口感稠滑。两杯都配埋糖包。由得客人自己添加噶。店里饮噶嘢大杯要贵过中杯6到8蚊。同其他咖啡厅差唔多噶系，呢度都有各种西式简餐，套餐和扒类，价钱唔平，求求其其都三四十蚊以上。有免费杂志睇同免费wifi上网。…Read More

年前来食过一次，觉得都唔错，特别系几种蚌同蚬留俾我噶印象好深，够大只，肉够肥厚。今次中午去食都系谂到有呢样嘢先去噶，去到都唔系好多人，成个午餐时间上座率不过6成左右。食噶嘢依然够丰富。贵妃蚌，黄沙蚬，呢D都系用玻璃水箱养住噶，生勾勾。而且涮熟后食唔会有沙，非常鲜美。无令到我失望。冷鲜柜里噶蔬菜同肉食都比较新鲜，几中意墨鱼仔同牛骨髓。炒菜熟食方面品种唔多，觉得焖雁鹅味道唔错，肉够林。豆豉味好香。锅底今次食噶系水煮田鸡锅，朋友食噶系水煮鱼片锅底。两种都有D辣。但都几足料。缺点系饮噶嘢比较少，就得两三种汽水同一种用水壶装住噶自制凉茶。因为人不多，环境都几好，不过服务员反应较慢。而家中午自助系48蚊，晚上系58蚊，都要另外加多2蚊噶茶位。性价比还可以。…Read More