65586559z的個人專頁

呢间生记小食店开业都有卅年嘞，以前店面同店里面都比较残旧，依家装修过，环境好咗好多。不过铺头真系好细，台凳比较密同窄，坐得唔系咁舒服。但呢到出品嘅食物的确唔错，好有传统广东小食嘅风味。点咗一碗鱼蛋粉同鱼蛋面，分量唔算好多，但里面嘅材料好足，有鱼蛋、牛丸、鱼皮饺、炸鱼皮等，鱼蛋同牛丸够弹牙，炸鱼皮够香脆，相当美味，但汤底略为多油同偏咸。…查看更多

呢间少爷波餐厅响惠福路食街入口唔远嘅地方，虽然门面比较细，但都几容易揾。少爷波餐厅嘅面积唔大，里面只有几张台凳，如果用餐高峰时段过嚟，就需要等位嘞。点咗一份海南鸡饭，卖相都几靓，尤其系配嘅酱汁，有三款，颜色好吸引。但鸡肉嘅分量真系好少，而且无配蔬菜，唔系咁健康。鸡肉都几嫩滑，但味道好淡，如果唔点酱汁，基本无味。…查看更多

呢间牛庄嘅装修唔错，环境比较干净卫生。用餐时间帮衬嘅客人好多，所以中午连路边都会加台。牛庄出品主要以牛肉为主，其实价格唔算实惠，普遍偏贵，但牛肉出品比较正宗，所以性价比都算高。点咗一份牛杂加牛丸粿条，里面嘅牛杂同牛丸分量都几多，而且好新鲜，牛丸够爽弹，值得尝试。…查看更多

呢间More Than Meow猫主题餐厅唔系响大路边，不过沿住涌边行，都唔难揾到嘅。因为餐厅里面有好多猫狗，都系放养，客人可以自由摸同抱，所以一入餐厅，服务员就会要求客人先消毒双手。餐厅里面嘅服务员其实唔多，所以点餐同上餐都用咗较长时间。服务员推荐咗猫猫八宝袋，卖相的确几靓，造型好特别，腐皮做袋，里面装住虾胶，仲有虾子，所以口感好爽口，味道唔错。…查看更多

节假日嚟到猫记艇仔粥，基本都要等位。虽然猫记艇仔粥嘅座位都算多，唔单只店内有座位，连旁边嘅棚架都放咗好多座位，但一样爆棚。呢到摞食物需要自助，除做艇仔粥同某D食品会有阿姨一盘搬过嚟问客人要唔要，其它例如煎饺、炒蚬同南瓜饼，都要自己去厨房排队摞。不过呢到嘅煎饺的确唔错，大大一只，里面嘅馅料比较足，味道鲜甜，但煎得略为有D燶，总体出品都唔错嘅。…查看更多

呢间果C益佰嘅店面都唔细，室内有卡座，店外亦有沙发座，坐得都几舒服。光顾果C益佰嘅客人唔系好多，所以去到嘅时候店员都只系得一个，不过尚算应付得嚟，上餐都够迅速。点咗一份芝麻糊，卖相都几靓，但外表睇上好大碗，其实下面系装饰，放加热用嘅蜡烛嘅，不过实际又无放蜡烛，纯粹摆设。芝麻糊都几香滑，芝麻味好香，但因为实在分量少，得几啖就无嘞。…查看更多

呢间点都德大茶楼真系好旺，每次嚟到都要排队等位。餐厅嘅装修真系好有特色，真系好有以前旧式茶楼嘅氛围。不过呢到嘅服务员真系少咗D，加水都等好耐。点都德大茶楼嘅出品价格唔算平，但每样点心嘅造型都好靓，比较有特色。最中意食呢到嘅油炸鬼，大大一份，炸得好香脆，口感唔错，相当新鲜，系每次嚟饮茶必点嘅点心。…查看更多

呢间潮港湾渔村响海珠湖公园对面，所以行公园后过嚟食饭，都几方便。餐厅嘅装修都几企理，环境唔算太嘈杂，服务员亦都几醒目。潮港湾渔村主要系食潮州菜，但都供应粤式茶市点心。所以中午嚟到食饭，既可以点餸，亦有茶点。芥兰炒牛肉分量都几足，芥兰够爽甜，牛肉应该加咗沙茶酱炒，所以几惹味。铁板竹肠卖相唔错，但竹肠分量有D少，不过都几新鲜。…查看更多

呢间老西关美食城响中山六路上，所以帮衬嘅客人都几多。不过店铺都好多座位，所以基本唔使等位，但可能要搭台。呢到服务员都几多，但上餐速度唔算快。牛腩啫啫粉嘅卖相唔错，分量够足，大大一煲，里面嘅牛腩炆得好软滑，够入味，但落嘅辣椒好辣，所以成煲粉都有D偏辣。椰汁西米露嘅分量就有D少，而且煮得太稠，口感似糊仔。…查看更多

呢间均安鱼庄嘅店面都几大，装修布置比较大排档，卫生一般，服务员都几多，动作都几迅速嘅。呢到出品嘅价格都比较大众化，所以帮衬嘅客人都唔少。呢到主要系食鱼，好多唔同嘅做法都有。觉得爽鱼皮唔错，鱼皮真系好爽滑，分量又足，连同花生一齐食，口感相当有层次；凉瓜鱼松亦都好有广东风味，鱼松唔会好多粉，鱼肉够爽口弹牙，值得尝试。…查看更多

呢间金早绿点开咗无几耐，就响市场旁边，店面唔系好大，但环境比较干净卫生，所以好多响市场买完餸嘅街坊都会嚟帮衬买包点。呢到除咗有蒸好嘅包点以外，亦都有包装好嘅售卖。店员态度都唔错，而且动作比较迅速，所以唔使点样排队交钱。买咗一包生肉包，11蚊有12只，包嘅个头都几大，分量足，里面嘅馅料亦都比较足，味道唔错，感觉性价比都几高。…查看更多

呢间金龙船海鲜酒家开响五星级酒店里面，装修当然好豪华啦，环境亦都比较干净整洁，坐得好舒服，服务员态度亦都唔错，好适合朋友聚会。当然出品嘅价格有D偏贵，但都物有所值嘅。点咗份蛋散，真系做得好松化，而且糖浆嘅味道唔会太甜，相当美味；蛋挞亦都值得尝试，外皮够脆，里面嘅馅料好鲜甜，蛋挞口感好有层次。…查看更多

呢间金汇潮庭响珠江边附近，环境都唔错。餐厅装修都算比较豪华，环境比较干净整洁。服务员态度亦都唔错，因为我哋系买团购嘅，亦都无差别对待。点咗一份蘑菇包，卖相真系好似蘑菇，造型好靓，里面嘅馅料亦都好好味；蛋挞做得好松化，蛋浆够香甜；粉果大大一只，分量比较足，口感唔错，值得尝试。餐厅原价有D贵，但买团购嘅话，性价比都几高嘅。…查看更多

呢间江南味道都几旺，用餐时间经常都要排队。餐厅嘅装修都几时尚，环境比较干净整洁，台与台之间亦都唔会好密，适合朋友聚会。虽然呢到嘅出品账面嘅价格都唔贵，十几廿蚊一份，但其实出品嘅分量都比较少，所以其实性价比唔高。最中意食呢到嘅糖醋里脊，味道有D似咕噜肉，酸酸甜甜，唔会好肥腻；云吞一碗只有四粒，同粤式云吞唔同，里面只有猪肉，但汤底里面有紫菜同鸡蛋丝，都几特别。…查看更多

亲戚响呢间江南厨房宴客，所以嚟食饭。江南厨房嘅店面都几大，装修布置都几新，环境比较干净整洁，但有D嘈杂。可能食饭当晚客人比较多，所以服务员都忙唔过嚟，上菜速度亦都有D慢。白灼虾都几新鲜，而且虾够大只，肉质够爽口；酸甜骨卖相唔错，味道酸酸甜甜，相当惹味；三文鱼刺身切得够厚身，亦都好鲜甜，口感好满足。…查看更多