kayokayo的个人专页

呢间酒家平时都旺下，价钱都唔算太贵，不过大厅好嘈杂。六个人都系食左两百几蚊，出品还可以。嚟到竹溪梗系要试下个烧鹅，唔知系米等左好耐，个皮唔系好脆，肉质都可以，味道都唔差。卤水鹅脚翼，都几大旧，几多肉下。烧鸡，肉质好结实，点啲甜辣酱唔到唔错。葱油饼，油比较多，冻左有啲硬，味道麻麻。…查看更多

听个名以为系专食顺德菜，有日去到见到超多人排队，等左成个钟先有位。可能人多嘅关系，服务员都显得好忙，叫佢倒水都要叫几次先有人过嚟，同埋上菜好慢，等左半个钟先上第一碟点心，上齐要个半钟。顺德拆鱼粥，个粥底都几绵，鱼肉变成鱼蓉，味道稍微淡左啲。炸春卷，外皮炸得都几脆，口感有点肥腻。其他都系普普通通。…查看更多

周末同屋企人去饮茶，可能我地比较早到，都唔洗点等位。呢度环境非常好，装修得好靓，不过冷气劲左啲，最好带多件衫去着。花旗参鸡汤虾饺皇，招牌雪山包，泰式白云凤爪，呢几样都唔错，特别系个虾饺，见到最多人点就系呢个。仲有黄金炸虾球同脆皮芝士牛肉都几好，外皮都系脆卜卜，啱晒啲后生仔女。…查看更多

有个小学同学住系呢度附近，有日佢约晒成班小学同学去行白云山，中午行完就嚟松风轩食饭。系呢度食饭可以亲亲大自然，空气好好，环境都几好，可以对住啲花花草草。点左只云山鸡，唔知系米呢度空气好，只鸡都特别滑。清蒸山水豆腐，口感同样系好滑，清清淡淡。仲有个沙姜猪手，沙姜味道好重，自己都几中意呢种味道。…查看更多

中午去完图书馆，唔知食咩好，经过呢度就入左黎试下。听人地讲呢间已经开左好耐啦，好有老西关风味。呢度人的确好多，坐到出门口，地方比较细，不过上菜都几快手。点左碗濑粉，份量都几多下，口感还嫩滑，好多萝卜粒，口感好爽，味道都唔错。仲有个斋烧鹅同炸鱼皮，送呢个濑粉都唔错。…查看更多

离屋企比较近，成日都会经过呢度，早上果时唔算好多人，地方都唔系好大。见到有团购，买左个套餐试下。5个9有两个包加一杯豆浆，当早餐够晒饱。热狗包，烤得有点干身，个皮比较硬，不过味道都几好。豆沙卷，呢个就比较松软，不过豆沙馅就唔系好多，味道唔算太甜。红豆豆浆，味道比较浓，加左啲红豆落去，饮之前要搞下佢，唔系啲红豆会沉晒落底。…查看更多

平时自己都唔系成日食韩国菜，不过个朋友超中意食韩国菜，佢话依度唔错喔，星期六就跟左佢黎依度试下。环境就一般般啦，不过都几有韩国风味嘅。地方唔算好大，平时人气都几旺下，服务员都好热情。点左个炒年糕，味道都ok，年糕唔粘牙。仲有个冷面，一般般，可能自己唔系好中意食韩国菜。…查看更多

听讲呢度个老板系印度人，整嘅印度菜应该都几正宗。首先入到嚟觉得依度都几有印度特色，服务员招呼好热情。睇左一下个餐牌，价钱都唔算太贵，品种都几多。烤鸡肉，烧得有点过火，不过鸡肉个口感依然唔错，味道广东人都可以接受。咖喱羊肉，呢个印度咖喱味道都几好，未去过印度，正唔正宗就唔知啦，啲酱汁配薄饼，都系一个唔错嘅选择。…查看更多

之前朋友嚟过依度摆婚宴，环境相当好，地方都几大下，无论布置定系餐具，都显得几高档。有几个菜印象都比较深刻，烧焦糖烟鸭胸肉，粉粉嫩嫩的，就算系胸肉都唔会韧，焦糖味道有点甜甜哋，食落味道啱啱好。槟城咖喱海鲜炒饭，咖喱味道唔算太重，米饭粒粒分明，唔太软亦唔太硬，口感唔错。仲有个泰国青柠梳乎厘，入口即溶，食饱饭再食呢个都唔觉得饱。…查看更多

嚟开依边办事，中午就到依度间间单单食左个午餐。地方唔算太大，环境尚算可以。虽然系茶餐厅，不过简单嘅小菜都几多下。点左个枝竹牛腩煲，焖得都几入味，够晒火候，份量还可以。姜葱霸王鸡，肉质好嫩滑，姜葱味道都几浓烈，唔错。鱼香茄子煲，茄子走过油，煮得好淋，味道都唔错，再加多两碗白饭。两个人一百多啲。…查看更多

朋友之前去过依度，话环境都几好，好适合聚会，今日就嚟依度试下。环境的确系几唔错，比较小清新，坐得比较舒服。价钱都唔算太贵，可以接受。点左份鸡中翅，味道都几好，不过煎得唔够香，肉质好嫩滑。培根烟肉忌廉烩意粉，卖相就一般般，意粉煮得比较淋，口感麻麻。芒果蘆薈綠茶，味道唔错，同仙踪林差唔多。…查看更多

呢度环境好好，五星级嘅享受，价钱相对贵左啲，不过依家有团购，398元四人餐。明炉烧鹅，块皮都几松脆，肉质好嫩滑，肥糕都唔算好多。红酒黑椒洋葱牛仔骨，食唔到红酒嘅味道，可能酒精已经挥发晒了，黑椒同洋葱味道相对比较浓，牛仔骨都几嫩滑，不过骨头大左啲。兰豆中芹百合莲藕炒木耳，一个比较清淡嘅菜式，好爽口。总体都几满意。…查看更多

呢间酒楼都开左好耐了，主要系有得饮夜茶，地方都比较好搵。地方唔算特别大，人气都好旺，次次去到都要等位。有折打价钱都唔算太贵，服务态度都唔错。虾饺，个皮好薄，里面啲虾都透晒出嚟，大大只鲜虾，爽口弹牙。青芥萝卜糕，外皮炸到好脆，有少少芥末味道，唔会好攻鼻。芒果椰汁糕，好香滑，口感唔错。…查看更多

位于珠江新城，价钱当然就唔会好便。同港式嘅茶餐厅都无咩分别，都系以卡座为主。人气都ok旺，上菜速度有啲慢。火腿蛋汤公仔面，味道同即食面无咩分别，卖相还可以。奶酱多士，好多炼奶，食多左就会觉得好漏。港滋美香滑奶茶，好多冰，开头奶茶味道都几好，不过饮到最后，味道变得好淡。一个下午茶就食左五十几，性价比一般。…查看更多

好多时都系食粤菜，今次嚟依度试下蒙古菜。环境布置得都几有蒙古嘅风味，睇上去一个个蒙古包，不过啲櫈就坐得唔系好舒服。服务员有啲可能系蒙古人，都听唔明佢讲咩。点左个烤羊排，味道都几好，不过稍微肥左啲。羊肉串，调味粉嘅味道好重，无羊肉本身嘅骚味，肉质尚算可以。葱油饼，脆卜卜，好香葱嘅味道，总体都唔错。…查看更多