Item: 丹桂軒(新都店)
Rating: 3
Author: 奧志雷

奧志雷

等級3

2016-06-16

前菜轉左做魚仔乾及秀珍菇仔啊，魚仔乾嚥韌帶咸味。秀珍菇醃過，爽口帶成味，兩款味道差不多，一般。

麻辣毛血旺，突然好想食辣野，第一次食毛血旺。大量香料、辣油辣椒、豬紅、牛肉、牛百葉、豬肚，其實肉不多，味菜香料一大埋，味道不辣不香又不麻，而且淡荗荗，紅當當顏色還能嚇得到人，油淋淋味道差。

川芎白勺魚頭湯，真係為左依個湯而黎，每次都必食。巨形魚頭鮮嫩可口啖啖肉，肉質滑溜，正到震呀 ﹗即叫即煮，足料藥材清香不澀不濁又有食療功效，好美味 ﹗

魚頭湯送大大碟生菜，用香濃藥材魚湯灼一灼，生菜有魚湯既藥材味道，湯又增添左菜甜味，雙得益章又錦上添花，更加好飲。大陸蔬菜真係新鮮過香港好多好多倍，可能塊田夠近。生菜翠綠，非常爽甜。

帶子魚翅灌湯餃，每次都必食，依然保持高水準。高湯鮮甜，瑤柱魚翅味濃，帶子嫩滑彈牙，飲到一滴都無，好美味 ﹗呷點醋酸酸甜甜更醒胃，可以食多幾個點心。梅子蒸排骨，味道甜美、肉香非常。遺憾地肉質過腍欠結實咬口，而且肥膏一舊舊，好肥啊。

鮮淮山雞札，好新奇呢，用芋絲代替腐竹捲住鮮淮山、海參、海蝦、雞柳及牛肝菌，配搭罕見有創意，淨睇食材超級健康有益，非常吸引。各樣都對身體有保健或治療功效，勁呀 ﹗

賣相都十分精緻，芋絲似著三點式泳衣，而腐竹似著直身長衫囉。味道好唔好就真係見人見志喇，清淡得黎帶微微肉味，有種清新既感覺，還可以。

麻辣燒賣，又係因為想食辣所以試試。其實食落都唔知係魚肉定係豬肉，燒賣中間釀左一篤仔麻辣醬就當係，我還依為餡料直接用麻辣醃呢，相差甚遠。成粒掉入口，微弱辣味，陰沉混濁，沒半點麻既感覺。而且麻辣跟燒賣醃味完全唔夾，接受唔到，難食。