川林海鮮酒家 (灣仔新海鮮街)

四月初同幾位朋友去左澳門+珠海兩日一夜，今次選擇住珠海。我地上、下午都留左喺澳門玩，到旁晚時份先番去珠海check in、晚飯。休息左一陣之後，我地就出發去灣仔海鮮街食晚飯。因為上次黎灣仔海鮮街已經係幾年前嘅事，印象深刻，記得好似三聖村咁，一條街賣海鮮，旁邊都係食店，自來海鮮加工。我仲記得食左好平！

事隔幾年再黎，好失望，唔會再黎

本來都滿心歡喜，但行左三轉都冇乜買到啲乜海鮮，我覺得呢度食海鮮仲貴過喺深圳、羅湖食好多。

最終我地買左一共 280RMB，有。利申：我地並冇講價講得好誇張

當買好海鮮後，就直接喺附近揀一檔食店去加工，食店選擇好多，我地冇乜頭緒，盡量揀啲人多嘅（冇人幫襯肯定有原因）

最後揀左呢間行得比較尾嘅川林海鮮酒家，幾大間，未坐滿但有唔少客人。聽人講話呢條街嘅食店加工費間間都差唔多，我地問左三間，確係唔差好遠。

白灼花竹蝦（加工 5RMB/一斤內）
白灼冇難度，所以只係收幾蚊加工費。

竹蝦雖然size唔係好大隻，但肉質會比較爽口。

加工費 5

¥5

豉椒炒花甲（加工 28RMB/2斤內）
呢款花甲王個殼就幾大隻，但唔係好有肉地，幸好冇乜沙。不過50蚊兩斤…算啦。

豉椒炒都係冇難度，唔會難食

加工費 28

¥28

沙姜炒八爪魚 （加工 28RMB/斤半內）
未試過呢種煮法食魷魚，味道唔錯！我諗呢間食店炒野比較拿手啲
魷魚炒到出黎就唔係話好多，但都好爽口、彈牙。

加工費 28

¥28

蒜蓉粉絲蒸扇貝 （加工 25RMB/10隻）
極大量蒜蓉，好似唔洗錢咁…粉絲都唔係值錢野，所以都幾多。

可惜上碟冇加豉油，帶唔到鮮味，只係食到蒜味…扇貝蒸得有少少過火，帶韌

加工費 25/10隻

¥25

清蒸水蛋 28RMB
我梗係唔會話你知我除左係雞翼控，仲係水蛋控啦。為左要撈幾碗飯，點左碟水蛋。

話說我冇喺國內食到過唔好食嘅蒸水蛋…今次食到喇

蛋蒸得老得滯，雖然裡面都夠滑，最致命係…完全冇味，又冇蛋味，又冇豉油味…

清蒸水蛋

¥28

白切雞 48RMB/半隻
雞比較瘦，肉唔多。

白切雞

¥48

咸蛋肉片芥菜湯 32RMB
我諗有9成嘅國內餐廳煲呢煲湯都可以好飲過佢…咸蛋影都唔見，肉片鞋到乜咁。
蒜蓉炒菜心 32RMB
呢個喺大陸食碟炒菜，算貴架喇，蒜蓉炒咋。

油菜油菜，菜就油左少少，過得去啦…

蒜蓉炒菜心

¥32

其他收費：

大可樂 15RMB/枝

白飯 2RMB/碗

餐具 1RMB/位

茶位 2RMB/位

最終埋單95折後 263RMB，連埋海鮮除番開每位港幣百二蚊左右，係唔貴，但冇食到邊樣比較突出嘅野。

至於海鮮街，我地都唔會再黎嚕，同幾年前黎，感覺爭好遠（唔知係咪嗰次我食午飯呢…）