Item: 木屋烧烤
Rating: 4
Author: tiffany110

tiffany110

等级1

2016-12-05

今日上深圳去完T街創意市集之後，又到左食晚飯嘅時候喇!!

今次羊仔想食串燒，所以就搵左間連鎖餐廳，仲要喺係LOFT 附近，由LOFT行去，大概要半個鐘左右，穿過個super大嘅公園就到喇~

因為我已經預計到陣間要食好多野嘅關係，為左我不斷增加體重着想，我地決定行過去，雖然攰就攰啲，不過辛苦過後有好野食，一切都值得架!!!

行左超過半個鐘，終於到達左目的地--木屋燒烤!!

木屋燒烤都幾大，好多枱，而今日都幾多人下，好彩嘅係有位唔洗等

嗰度就係串燒出爐嘅地方喇，每當枱面嘅野食食完之後，我就會望實，睇下我叫嘅野食黎到未!35分鐘內未送上食物，免費贈送，係餐廳對食客嘅承諾，而事實上，食物上餐的速度都幾快下羊肉串當然係必叫嘅野食啦! 羊肉、肥膏隔住咁串起，羊肉一啲都唔韌呀，又好香嘅新彊香料味，好似我好耐之前喺北京大街食嘅羊肉串咁呀!!而且我覺得一啲都唔貴，我地前後叫左2碟呀

豆腐皮又係羊羊至愛，所以見到menu有就即刻點左，不過份量真係幾好多下呀，我覺得係四人份量，重料之選!!羊羊細細個成日都食饅頭，所以見到有饅頭食嘅話佢一定叫，可惜嘅係呢個烤饅頭有啲乾，又無醬料係上面，所我覺得麻麻地~~烤茄子都係必叫之選，除左好平好抵食之內呢，就係蒜蓉好入味，記得食之前要將蒜蓉鋪混啲，如果唔就有啲咸架喇~~

烤羊排我就麻麻地喇，本身叫嘅時候以為佢羊排位嘅肉，點知上菜嘅時候先知佢連骨都串埋，其實可以見到廚師嘅心思，因為要將羊加骨切好，再串成肉串都幾考功夫嘅，但係，本人係嘅超級懶嘅人，所以大塊大塊肉先係我杯茶呀!! 不過都幾好味架，所以鐘意骨嘅朋友不防都可以試下~~

最後要推介嘅就係呢個烤扇貝啦，熱辣辣嘅扇貝加上香噴噴嘅蒜蓉，簡直係無得彈呀!!!我地前後叫左2碟呀!!!

(以上食记乃用户个人意见 , 并不代表OpenRice之观点。)

用餐日期

2016-12-03

用餐途径

堂食

人均消费

¥100 (晚餐)

味道

环境

服务