Item: 品村料理会所
Rating: 2
Author: 奧志雷

奧志雷

等级3

2016-06-04

去完水立方揼骨，團長帶我地黎萬象城食晚飯。我從來都未黎過，亦估唔到深圳有?咁既地方，名店林立，不過無咩人買野，個個大陸人沖晒去香港掃平貨 ﹗未黎過萬象城，更加未黎過品村啦。睇落環境都幾寬敞喎，分兩邊，一邊西餐一邊日餐咁啦。二百幾蚊人仔個任食晚餐，是但啦，試下無妨麻。

雜菜沙律，我堅覺得食緊什草囉，碎濕濕點食呢。泰式生蝦刺生，都叫做穩穩陣陣既，蝦雖然無味，但有個泰式酸辣汁頂住，不過不失 ﹗如果有埋蒜片夾埋一齊食就更好啦。胡麻醬菠菜，普普通通無特別，爽口幾好味。

胡麻蘆筍，放得好骨子喎 ﹗哈哈，得幾條邊夠咁多人分呀，好采係任食乍，再 order 多兩個先。味道清甜多汁又爽口，好好味喎。串燒牛柳，嘩 ﹗又羶又乾硬喎，好野喎。

三文魚他他，三文魚凍到似食緊雪芭，三文魚蓉本身已無咩味道，一般都係刮剩係魚骨上面既魚肉黎做，味道好淡口囉。炸軟殼蟹，炸粉仲多過蟹囉，掩蓋蟹肉味道，都算炸得鬆脆，不過好咸喎。

香煎鵝肝配蘋果，鵝肝偏瘦，跟蘋果配埋一齊味道硬係怪怪的。醬燒羊架，味道唔錯，又夠腍又啖啖肉。牛油忌廉沙蜆，發育不良細細粒既蜆肉，而且有砂添呀，救命 ﹗

魚子軍艦，係依度全部都係叫做壽司，並無軍艦之分。壽司飯又爛又黐口，半點醋香也沒有，失敗。好采有咸香既魚子加上清香既青瓜片，都一試無妨既。