為食Demon的个人专页

自从那个外星人都教授上演之后就席卷了一场来自韩国星星炸鸡啤酒之风，后黎市面上即刻多咗好多不鸟其名的炸鸡小吃店，无霖到出戏嘅Pelicana真系杀到黎广州，真系觉得广州好幸福啊，北京路呢间第一档真系由开张到家阵我都未点系入面坐低过吃野，次次路过都鬼Q死咁多人，仲要挪筹等位，等位仲要系门外面等架，天时暑热吃唔吃都罢咯，今次过黎纯粹系冲住抢购秒杀领奖来的，哈哈哈~我好犀利不断刷屏用1蚊鸡抢购了1对鸡腿回来，赚大了（如果OP都有D咁嘅福利就好了）环境黎讲呢树真系几舒服几过瘾嘅，三两知己做咗吹下水都可以，周围摆住好多生招牌系树，只鸡几搞野，话说点解距唔搞line公仔呢？！太红太火了~小吃呢就选择少咗D，大都系炸鸡，感觉有D似走KFC的道路，不过距过人之处莫过于距嘅饮料柜啦，劲多的韩国饮料，啤酒同汽水一大堆~讲到关键的价格上，基本8件4对鸡的价格就系42rmb，两个人当小吃唔错而且够，吃完都小饱了，跟住黎翻支野饮几赞的，另外距地仲有饭吃的距D炸鸡一共有7只味可供选择嘅，包括原味、香甜、香酥、微辣、重辣、蒜香、酱香，今次拣咗香甜，本黎仲有个蒜香嘅，点知道落错单比错货，哎~距地嘅炸鸡基本上都系预炸起跟住根据客人的口味配酱捞匀，炸鸡基本上保留些许脆感，内部肉质嫩滑带少许汁，加之面头嘅酱料一齐吃真系几正，不过香甜呢系带微辣嘅，甜辣甜辣咁几特别，感觉无蒜香咁热气，哈！不过今次打包翻屋企之后发觉距地D鸡腿唔知仲乜好细只，有一两只又特别大喔，奇怪啦~如果份量都再细就真系唔多值得喔！来自星星的啤酒炸鸡，完全值得一试！…查看更多

心情唔多好路过此地口渴渴想试试呢间门面望住唔知叫啥嘅店尝鲜！！铺面好细，一楼只有4张双人桌餐位，小规模成本低哈~不过仲有2楼添架！开放式厨房，追求干净企理，缺点就系加工的所有温度都直接share比顾客，空调温度又唔系好够，有D热咯，而且灯光有点欠缺！见到D服务员就真系几热情，而且员工们工作都几团结开开心心嘅，前面张台从开始吃野就不停收到服务员嘅“热情强烈推荐网上评价”啦，me由于带住耳机一直玩，好再未受滋扰，讲真有D野呢顾客有自己嘅选择，一餐饭顶多2次左右推介都已经好足啦，唔需要成日提系口边吧，而且你确保顾客对你们的意见都系赞赏么？另外，他们的服务员有时候真的不知道干嘛的，下单咯喔让顾客不停的等，而且居然叫人家上2楼居然又没有后续服务，让人家上去干叼啊，而且他们的订单生产流程肯定有问题的，我就叫了个泰柠soda，下单时间是6点50分，居然等到7点15分左右我才自己亲自去拿自己服务自己，而且调饮料的人居然还会问我一句“先生，你要的是什么？”，最后来了一句“唔好意思啊”，顶！而且讲真啦，我叫嘅只系泰檸soda，1分钟都唔使就搞掂嘅，你要我等成半个钟。。。。真系极度无言，所以一有就拿拿声走人！当我呆等果段时间，我见到前面张台距地上饮品之后会有只好特别嘅月饼尝试，门口都贴住同服务员都讲话呢几日都会送比顾客试试，但。。。我就真系未食到呢个所谓嘅月饼咯，讲真我呆等半个钟，你随便掉个比我试试等我唔好咁无聊玩手机都好吧，虽然唔志在个月饼仔，但呢个真系感觉唔太公平咯！至于讲到最实际嘅味道啦，距地所谓嘅正常冰量系大约1/3-1/2冰嘅，所以拿上手真系好len冻，饮晒都仲有奇多！我叫嘅大泰檸soda700ml嘅，17蚊，构成分别有冰+泰檸大概1小粒+纯味soda~我已经出尽九牛二虎之力将D泰檸味嘟晒出黎架啦，点知道饮落只有那么一点点味道。。。未免太省太赚了！其实呢间野主打都几新奇几绿色，值得试试嘅，只系好多后续嘅野总觉得怪怪嘅~报告完毕！！（由于听到D服务员成日提提提上网留言，所以绝笔好耐嘅我都唔忍心唔写翻D感受过距地咯，哈哈哈哈）…查看更多

茶友就系中意周围叹下茶，太古仓南粤嘉宴闻说都有段时间，周末时间终于黎咗试试！一栋现代朴实矮楼就咁起系旧式红砖仓库对面，对比确实强烈~一楼嘅楼层高度同北京路幸运楼有得挥，高楼层比人感觉空旷，配以灯光与阳光相辉映非常舒适，大堂格局好大，餐台间隔适当，唔知系咪空旷得制总觉得呢树略为吵杂。【事件一】周末黎到人比较多，排队等候坐满等候区同门口，等咗段时间咨客叫到啦，点知竟然讲“功夫茶，搭台”，即刻比我拒绝~坐都未坐低跟住又叫我啦，呢次系“普通茶，唔使搭台”~心霖你地系咪玩野呃钱嘅，普5蚊功8蚊，差额都够吃碟点心啦！【事件二】点心小点5蚊，中点9蚊，跟住好似3蚊一级跳~价格算中上啦，找数至发觉原黎呢树节假日要加收10%，但呢个服务费我真系好唔愿带有点嬲添，呢树服务员算几多，但总觉得无人做野，壶盖放起N耐无人加水，点心碟放N耐亦无人执，你仲好意思加收，何来嘅服务呢？而且最嬲嘅系点嘅煎饺成个几钟都唔上，部长话无饺子卖晒要去包至有，咁落单无你就唔应该剔啦，无点心仲好意思开门做生意，嬲嬲地拉拉声结账唔鬼埋饺子，当时仲递碟饺子上黎，立马发火成粒钟唔上埋咗单啦！饮茶对我而言，最紧要嘅莫过于食物质素同服务是否到位~呢家茶楼经此一役，直接列入服务差行列！（续后）…查看更多

（续前）呢树嘅出品黎讲还算可以的，就系价钱偏高咗D，小中点简直一只手掌数得晒咁制~点心系12蚊左右。粥(￥14)：绝对系呢树嘅一大亮点，可以用一兜粥黎形容分量之大，三个人吃都够饱~而且料都几足，粥底都算绵滑细腻，配以皮蛋瘦肉葱花嘅味道提升不少，加之呢树嘅猪肉选取部位定猪种较特别，肉色偏深而且嫩滑。油炸鬼(￥5)：吃落始终唔系以前嘅感觉，口感偏硬同厚身，好在尚算脆口、干爽唔油腻，送粥最正。姜汁肉丝包(￥12)：味道几清淡，面包软熟馅料肉质软滑，姜汁略轻。粉菓(￥12)：呢树有两款，意外点咗平时唔吃开嘅潮式，咬落始终都系外皮烟韧馅料爽脆，但系馅料变晒萝卜干沙葛粒酸豆角粒等，味道比较奇特。马蹄糕(￥12)：切得算厚，而且马蹄好多呢，不过可能撞彩吧…咬落爽口弹牙，甜度适中。马拉糕(￥9)：糕身软熟而且唔黏，黄糖嘅分量恰到好处，唔会太腻，呢个算系我吃过较好嘅马拉糕。对于呢类服务质素跟唔上口碑嘅茶楼真系敬而远之，一次足矣~…查看更多

楼下嘅大排档食街从以前1-2家拓展咗一倍，而且铺面都越开越大。原汁原味可算系最大嘅侵入者，平时都非常旺场，主要都系做街坊生意，由其以距地嘅切鸡最抢手，价钱都比较公道，出品总体还可以嘅。环境黎讲两层嘅格局容纳到几多食客，夜晚仲会系门口加台添，坐落就比外面嘅大排档多个楼顶咁解，有时候会觉得比较多乌蝇，但方便偷懒开饭就将就下。白切鸡：鸡嘅色水感觉就麻麻，但系皮薄肥脂较少，咬落爽滑嘅（屋企真系唔知点至整到人地咁正），肉质实正滑嫩，鸡骨尚带血色，听闻话系为保持鸡嫩滑浸唔够耐。配搭姜葱一齐吃够晒原汁原味~莲藕饼：爽脆嘅莲藕碎配以爽滑鱼胶煎成只只大小均一嘅圆饼，吃落香脆可口，就爱送饭。叉烧炒菜软：叉烧以梅叉为主，啖啖肉咸香肉质略粗嚡，搭配菜软一齐炒带出菜软嘅清甜，相互搭配唔错。家庭餐体味原汁原味嘅菜式，简简单单就能满足~…查看更多

江南西嘅小资装修餐馆越开越多，商家宣传得好靓，但食客反馈嘅食评却大多截然相反！心口挂住个勇字嘅吃货，既然有机会黎开附近就体验一把。虽然江南西街巷都算熟悉，但要遇见距都转咗好几个圈~黎到门口确实同周围环境与别不同，欧陆式嘅风格装嵌到小屋内，确实几过瘾，入到去大厅只有几张台行入里面仲有位置，装修都几靓坐得几舒适。白汁鸡扒饭：出品比人嘅感觉就同碟头饭无咩区别，比人感觉好普通。鸡扒连皮都算大块，MS系用神马汁腌制过嘅，吃落肉质几滑溜，白汁上漂住嘅橙红色油迹…见到都有点打冷震，而且白汁吃落非常稀，面头嘅青豆粟米感觉都好罐头。配料仲有三片青瓜同心形鸡蛋，无咩感觉~飞碟：碟头饭吃得唔系好饱就叫多个飞碟，点知道居然只有一片面包嘅分量，未免太坑了，咬落几香脆，馅料感觉就无几，味道一般般。【事件】无叫饮品霖住要杯清水，服务员转转入去出黎讲清水要收X蚊，即刻呆滞无言了。以环境吸引顾客来访嘅店铺真系不少，品质跟唔上真系大跌眼镜。开始仲要排队，霖翻都想笑~…查看更多

有晚《我爱返寻味》介绍江燕路聚吧109嘅咖啡，至知道原黎开张咗间咖啡馆系附近，而且距地嘅位置真系几偏僻，除左住系入边嘅住户，往时好少人会行去果边啦。咖啡馆设置系旧乒乓球厂区入口处，旧厂区家阵活化为双鱼港，厂房都改变成私人写字楼格局。咖啡馆环境真系好掂，虽然门口睇上去比较普通，落地玻璃窗台仲有小露台梯级仔，但入咗去红砖铺设嘅吧台带出咖啡馆嘅味道外加点自然感，再入黎后花园可以睇到店铺全景，玻璃屋结构采光好自然舒服，后花园更加贴近大自然，古老大树屹立于一角，再加上店主悉心添加植物等摆设，整得好舒服好有意境，呢个亦是我嘅Dream Café嘅大概模样呢。招牌咖啡(￥28)：首先以距玻璃小杯端上，感觉就几靓嘅但转头霖28蚊嘅价钱系出面大概都可以饮到12oz嘅大杯咖啡，略感性价比偏低。呢杯招牌特别之处在于面头嘅糖焦层，试咗下感觉就系粗粒糖包用火烘烘嘅感觉，口感粗糙。奶泡方面，感觉应该未完全打得够，中间仲有超多泡泡，饮落就无咁绵滑细腻了。咖啡捞匀感觉尚可嘅，味道浓郁而苦涩味轻~配料方面，呢树用嘅糖包系国产嘅红棉白砂糖，比较特别…总体觉得就颇为一般。三文治(￥12)：三文治飞碟嘅做法，一开头望住menu完全搵唔到，于是问服务员至知道系距。伴碟嘅圣女果整成兔仔型，几讨顾客欢心嘅，亲切可爱嘛~略为感觉距地好似飞过热水，有少少皱嘅感觉，不过干净好多。三文治烤得两边香脆，里层午餐肉同...芝士吧嘅物体结合增加层次质地，芝士味道特别酸酸甜甜嘅，吃落可口醒胃。牛奶布丁(￥10)：冰冻嘅布丁，暑热嘅天气叹翻樽透心凉更甜入心，玻璃樽份量比外面嘅略为大少少，吃落嫩滑、入口融化、奶香浓郁、甜度适中，店主仲好有心咁帮个樽带蝴蝶结。宣传欠缺嘅舒逸咖啡馆，偶尔黎舒缓一番当真唔错，就系性价比高D质量服务再提高下就完美了！咁靓嘅环境下配以特色小食饮品，叹到痹啊~…查看更多

一朝无意间发觉楼下多咗间叫8090嘅café，趁住周末就过咗去试试，当时仲系试业期间有8折优惠添！环境黎讲褐色调，落地玻璃门透光度十足，简单嘅餐桌椅坐住尚算舒服嘅，奇怪嘅系老细每张台摆住块杯垫系树，maybe当做宣传吧~而呢树嘅出品感觉都偏潘朵拉之类嘅特饮店，感觉同正宗嘅咖啡馆差紧截，一直都比较疑虑距地唔会用神马精调配的吧。呢树嘅饮品价钱中等1x-20蚊左右，仲有现制现做嘅松饼添，价值17蚊一底，值唔值就见仁见智啦。试业期间都见几多街坊过黎坐坐，不过近排就感觉有D静~学生们都放假了！雪顶焦糖拿铁(标准￥16)：又失策咁唔记得飞冰，成杯野上层到几乎中间感觉都系冰块，面头嘅奶泡打得几绵滑细腻，配以少少嘅焦糖，舔舔几sweet，搞匀咗成杯冻咖啡几中和，但始终觉得咖啡味好似偏淡，夏日饮翻杯感觉确实几清凉嘅。双色朱古力(￥11)：两层朱古力入口几绵滑、甜度适中，黑白配搭得几夹，唯独是觉得距地嘅蛋糕层整得比较粗嚡，略影响口感。介乎于特饮店同咖啡馆之间嘅饮品铺，总体感觉差强人意，感觉勉强用8090吸引8090呢部分人群，但呢树附近都系做学生街坊生意，真系唔系咁好搵嘅，望多优惠。…查看更多

恒宝广场直上几百米有住间好多吃货推介嘅源记肠粉店，铺面都系大排档嘅感觉，敞开式嘅厨房，现点现煮嘅粥粉，热辣辣嘅环境配搭大把嘅风扇。粥粉价格都比较实惠，10蚊左右一个粥粉卓卓有余，坐系室外台凳比较清爽，不过呢树系自助服务嘅，买完记得递票同挪野哦！猪腰粥(￥6.5)：师傅猛火滚粥底同配料，分几钟就搞掂热辣辣上菜，吃落粥底绵滑，配以煮得恰到好处嘅猪腰，滑嫩爽口。夏日吃粥虽然吃到热辣辣，但正好可以清肠胃，恢复食欲。炸两肠(小￥3)：呢树系铝框蒸嘅，不过依旧可以做得滑溜略带韧性嘅肠粉皮，中午时分当然吃个特别嘅炸两肠，炸两依旧略带脆口配以软滑嘅肠粉皮，几特别嘅享受，距地呢树嘅味道都比较特别，唔知系酱油定系油炸鬼，吃落有种好特别嘅咸香。粥粉搭配无可挑剔，而且选择多样化，一碗香软绵滑嘅粥配以一碟鲜嫩滑溜嘅肠粉，简单和味。…查看更多

西华路雄记酒楼入口处有间西村富记鱼蛋粉，标榜名师制作驰名省港澳，足知有日坐低品尝了。粉面档都系果句平靓正宣传语，大多野食价格都系5-8蚊，但求吃饱嘅话性价比真系几高。铺面几开敞式，饭堂餐桌模式，自助服务（要自己去挪野食嘅），楼顶挂住几台吊扇，坐到边都凉爽~加料鱼蛋粉(￥7)：望住餐牌第一行就系加料什锦鱼蛋粉觉得好好奇，点样加料法呢，系咪配料多D咁解呢，点知道煮好望住碗野其实无咩咁特别，只系多咗够猪手定猪脚咋嘛，不过鱼蛋粉加猪手脚确实有D诡异。始终都系最爱鱼皮，香脆可口，但系好似唔够松化，肉丸、鱼皮云吞的都系每样一粒，感觉好少呢，鱼皮云吞韧度十足够嚼头，够加料猪手脚焖得几入味嘅，咬落好啫喱，骨胶原几丰富。吃晒D配料就剩低成大碗河粉，吃晒真系够晒顶肚~鱼蛋粉始终觉得同福果家最正，配料多味道正！…查看更多

西关闻名嘅恒记婆婆面分店开到去文明路尾噜，文明路由仅有嘅几家甜品店同炖品店越开越多食肆，临近北京路就系吃人气呢，连婆婆都唔执输！呢家分店大小适中、普通传统嘅表面装修，卖住闻名嘅面条，就系新闻稿“韧度十足，婆婆面飘香二十年”咁写住，吸引我行过黎一尝出品。炸酱面：面条软韧适中，唔似果D橡筋面咁恐怖，上碟面条几干爽配以炸酱料捞匀几惹味，酱料味道适中，有些许肉碎同酱料拌匀，不过感觉料好似少咗D，多翻D豆干之类嘅可能更正。净云吞：呢树嘅出品系传统嘅鱼尾肉馅云吞，云吞皮就几薄几滑嘅，但吃落馅料味道比较淡，而且肉质比较偏瘦嘅感觉，略显一般。呢树嘅细蓉感觉真系细呢，只有一小碗，一拄面同几粒云吞，性价比超低，一两啖就清晒！传统面食店追求的应该系那独有的味道吧，但可惜嘅系搵唔到婆婆面嘅味道呢….…查看更多

零食铺甜心物语又搞新意思了，新开菓子烧专门店——和风烧！越富II期入口处设置细细档售卖点，菓子烧同隔离嘅鲷鱼烧其实都系如出一辙，只不过菓子烧形状多款味道多样，而且呢树嘅公仔卖相真系几cute，有龙猫、福猫、相扑手、福伯等六款形状，不过距地嘅size就啲骰，基本上可以一啖一件落肚。店员基本上系现做现卖，存货比较少，所以要食就要等下啦~而且距地有优惠套餐，5蚊1件、10蚊3件、20蚊7件、30蚊12件，仲有特饮添！距地嘅菓子烧外皮定型得几干脆硬身，所以扎上手都无有使惊，而且灯光照耀下闪粼粼嘅，其实需唔需要惊落咗神马呢？外皮咬落软熟略带点脆口，觉得粉皮浆应该比较纯，烹调时间都好够（店员会set好闹钟黎整嘅，不过起率好似麻麻），龙猫系奶油味嘅绵滑细腻唔漏喉，福伯系芒果味嘅微微果香，相扑手系红豆抹茶味嘅仲可以吃到少少红豆呢。呢树嘅馅料感觉都比较软滑，而且味道淡淡嘅，唔会太香精呛口嘅感觉，饼皮仲略带蛋香，几盏鬼小食！和风菓子烧，可爱嘅卖相包裹住各种嘅味道，见到都开心~…查看更多

自从出现N多表字辈之后，又迎黎婶字辈了！之前见过六婶、肥婶神马的，肥婶分店终于踩到黎都快成年噜，一直都旺场，都系周围几个楼盘嘅街坊生意多，有时候想吃个饭都要等位。铺面讲真唔大，而且餐台铺排得好紧密，有时候觉得行入去都比较困难，入面仲有几间房添。可以抓住街坊嘅胃始终在于性价比过得去吧，餸菜锅气够而且分量足价钱都算合理，再者干净卫生企理，难怪周围嘅街坊中意长期帮衬嘅，而且周边真系少竞争，要么性价比低要么环境卫生差要么非粤菜系！求食肆求mall啊~葱油鸡(￥38)：皮爽肉滑，肉质略带咸味，配以红葱头囋以熟油，吃落咸香滑溜就系正，胸肉腿肉最正！肥叉芥兰(￥28)：算系呢树招牌菜吧，呢树选用半肥瘦叉烧同芥兰一齐炒，叉烧嘅香气野味渗入芥兰中，就如同猪油炒菜咁，碟头够大碟，性价比高！咕噜肉(32)：酸酸甜甜嘅汁配以炸过嘅酥肉，配以洋葱青椒菠萝炒，开胃清甜，啖啖肥瘦嘅肉唔黐牙，呢树蘸炸粉比较少，吃起身爽好多。酿尖椒(￥29)：肉馅酿得尖椒饱满，煎得肉质香口尖椒爽脆，尖椒略带些少辣，啖啖肉吃起身好过瘾。黄鳝饭(￥55)：一煲黄鳝饭起码有7-8碗饭，不过呢树味道麻麻，师傅煮得时间可能唔多够，上黎嘅时候始终略带湿，吃落烂咗D，而且觉得味道略淡，黄鳝都唔算多而且碎，配搭香葱味道略算香嘅。红豆糕：呢树吃饭有卡赠糕，不过略为少气，每人得一件红豆马蹄糕，料几足，吃落糕层爽口红豆软滑。（以上价钱唔知呢排有无升价哦…有会员卡可以有部分打折优惠）肥婶其实就系常来嘅分店，家阵广州嘅分店都越开越多，而且口碑唔错，性价比高，街坊生意~…查看更多

大禾寿司应该算系广州回转寿司嘅领头羊吧，出品保证经久不衰，每晚仲有特价活动，难怪捧场客咁多啦！之前无意中系淘宝见到有人打折放团购票，即刻就抢咗几张，转头就去吃咗距啦~大禾一直比我嘅印象就系偏贵，事实确实如此，不过品质确实有保障嘅，而万菱汇新店卫生几干净企理，吃得安心好多。主食：黎咗叉烧拉面同饺子乌冬，叉烧肥瘦参半腌制够味，不过感觉切得比较薄，与丰富嘅配料配搭，加上软滑略带韧度嘅拉面，再黎多啖汤，大啖吞落肚享受各种混合嘅感觉，正！饺子同乌冬分开上，感觉就似单点汤乌冬加小食饺子，饺子馅未够饱满炸得略带湿，外皮炸得相当香脆可口，乌冬略感饱腹而且味道略淡，吃落比较寡。寿司：为试到各种味道选择咗三食品种，三文鱼三食火炙同刺身都好正，刺身嘅鲜甜嫩滑，火炙嘅略熟嘅鱼肉配搭沙律酱酸甜可口，海鳗寿司绵滑肉质一D都唔腥，沙律酱搭配乜都百搭酸甜开胃。军舰寿司嘅紫菜脆口配搭各种配料清凉爽脆~夏日就系该吃寿司降暑呢！呢树嘅花之恋用三片大大三文鱼包裹，吃落啖啖三文鱼肉如同吃刺身甘，鲜甜清爽。小食：鸡翼充满明太子，一啖咬落去汁都飚晒出黎，而且外皮同里头一样脆啵啵，正爆！日料消费始终略贵，但间中享受下都唔错呢~大禾嘅出品难怪特价时段顾客络绎不绝啊！呢排天时暑热都系搵间好好地卫生过关嘅日料店吃好了~…查看更多

位于西华路金花庙后街嘅牛羊杂汤嘅威名经已响亮好耐，不过一直都搵唔到，好在皇天不负有心人足知有晚经过嘅时候见到有几条友系条巷入边排队唔知搞咩，行入条巷及及嘅时候终于比我揾到距噜，老板成个厨房都摆晒系室外，有时两公婆有时一个人做，卫生环境就无得讲咩架啦，不过望距整野台厨车都几干净嘅，旁边有间屋仔放住几张台供食客坐低慢慢叹嘅。呢间野嘅生意都几旺，虽然D野少贵，不过每次都好多人，差D无位坐要企街~牛羊杂汤(12)：呢树嘅汤底胡椒味略重，但系调得几惹味，搭配酸萝卜同满满一碗热辣辣嘅牛羊杂，感觉好满足呢！距地嘅牛羊杂吃起身觉得几干净、无咩异味，杂都几爽口而且特别嘅羊杂居然无咩骚味喔，可能系胡椒同长滚住嘅共同作用吧！其实牛羊杂嘅区别系咪就系颜色上嘅差异，羊肚羊肠的好似都系白色，而牛杂嘅就沉色呢，吃完满满一碗足料嘅牛羊杂再饮啖胡椒清汤，呢个杂我中意。牛三星汤(11)：牛三星汤嘅话距地系现点现做嘅，可能怕滚得耐韧吧？依旧系酸萝卜底配以葱白面，满满一大碗嘅牛三星见到就流晒口水，感觉都系第一次食到咁干净无异味嘅牛三星，平时嘅总有股特别嘅内脏味道？件件咬落都好爽口又嫩滑，胡椒味帮助都唔少！萝卜牛杂(12)：呢树嘅牛杂料都系肠同牛蒡多，唔知点解无肚嘅呢，不过肠都有几多种~不过多咗够奇怪软骨过黎，ms系喉骨，好似D恐龙骨咁！呢树嘅牛杂汁感觉味道刚好，几惹味之余唔会咸过头，牛杂焖嘅时间应该都好够，入味之余几嫩滑软身，咬落仲有D咬劲，脆骨焖得够耐好爽脆！唯独觉得萝卜分开煮味道好似唔够入味遮~只要用料足味道正，哪怕巷深难觅，吃货都唔会放过~啦啦啦！…查看更多