奧志雷的个人专页

點解羅湖過關唔見港民通道既？港民要走外國民通道？上次最衰個大媽打尖，搞到我要企門口等位足足 30分鐘！今次已托朋友訂好位，預留烤鴨及魚頭湯，非常安心地入座，不是太多食客，可能大家都出國外遊了！歡迎來到大媽圍城、四面楚歌、鬼殺咁嘈、高聲喧嘩！仲要開大手提電話喇叭睇戲、打機，丹桂軒係您屋企呀？麻香雞腳，硬實爽皮，爽猛猛幾乎食唔到肉。烚花生，我不吃花生，只吃烚花生！濕爽陣陣鹽味香料特別和味。豆角，咸咸地索索聲。鴨掌，爽爽瘦瘦細細隻。上次經常見的肥嬸嬸廚師呢？換來瘦嬸嬸廚師喎。川芎白芷魚頭湯，酒味超級強烈，會唔會醉架？湯汁鞋身不夠幼滑，還有白色浮游物，從來未試過呢。鮮魚味濃藥材味濃，幸好都好好飲。今次川芎白芷大魚頭湯天地極品！嬸嬸廚師堂煮非常耐心烹調笑容滿臉，感覺溫暖。滾熱辣香噴噴，最緊要落料酒，提香提甜！魚肉嫩嫩滑嘟嘟，啖啖肉啜得開心愉快！特濃魚骨湯底，黏稠濃郁甜到世界盡頭！加入爽嫩生菜泛出菜甜味，湯汁更鮮更美味！川芎白芷魚頭湯千年如一無得輸！餚足幾小時的深海魚骨湯底，再加入藥材及新鮮大魚頭，數量有限，賣完即止！熱辣辣送上，酒味甘醇清爽，既能僻腥又能吊出獨特鮮甜味，濃厚湯汁散發少少藥材香氣，大叫好味道啊﹗魚肉嫩嫩滑溜溜，啜得高興暢快。北京烤鴨，平靚正片片鴨兩食，年青師傅耐心地堂片，仲非常親切有禮貌，難得難得，非讚不可！擺般精美奪目，藝術品一樣。鴨肉鴨皮青瓜配鴨醬芥辣，創意與味道配得天衣無縫，油香肉甜頂級滋味。極品！背脊皮只得幾片絕無緊有，乾爽香口極卜卜脆。油脂甘甜不膩，越食越起勁！北京烤鴨堂片烤鴨一隻兩食。抵到爛人仔 $400 蚊兩食，京式烤鴨及蔥爆鴨件，平靚正快狠準，水準依舊優質 100 分！烤鴨訓得十分安祥，表情寬容讓師傅盡情發揮。可選港式肉連皮一齊片或京式淨胸皮及髀肉連皮，各俱特色及風味適隨尊便。京式片皮鴨配以乳豬醬、芥辣、茄汁、菠蘿、京蔥、白蔥段、青瓜條及三份薄餅，跟香港大有不同。京式片皮鴨，中間全胸脆皮，圍邊鴨髀皮連少許嫩肉，皮脆肉鮮肥美多汁，甜美醇香，醃料芬芳無得頂。貪心的我當然要鴛鴦齊嘆！胸髀同時食捲住食，添上乳豬醬、芥辣、青瓜，撞得出色擦出火花，百味融會交錯，食到不能自拔。北京烤鴨第 2 道菜蔥爆鴨肉！骨少而啖啖肉夠滿足，大量蔥段經過爆炒變得勁香甜爽嫩，就算討厭蔥的我都食得津津有味！辣椒蔥段夾鴨肉，惹味帶辣精神爽利一再回味！蔥爆鴨件，京式片完鴨後還剩下大量靚肉，爆炒鴨件香噴噴啖啖肉，肉汁飛射，薑蔥惹味提神，全部被我一個清得乾乾淨淨，如果配碟撈粗麵或伊麵就更完美！叉燒腸粉，成棵芫茜捲在腸粉中，應該叫芫茜腸更能理解，我真吃不消！墨魚汁香脆墨魚膠腸粉，凍冰冰硬掘掘，少有的劣質出品。鮑汁雞腳，每次到訪必損腳趾，損得過癮，鮑汁芬芳回味，雞腳炆得半爽半滑帶黏，啜得乾乾淨淨。皮蛋瘦肉粥，粥底無味既？不過真材實料，重手重料十分多。咸瘦肉絲幼幼的，皮蛋肉絲味濃，但粥底真的太淡。唯有加蔥花榨菜胡椒粉，味道稍為提升一點點。綿綿粥底撈菜甫蓉更鮮甜，溫柔住家味熱食最美味！水晶蝦餃，餃皮一夾即爛，蒸到黏爛粉無彈性。原粒蝦仁燒賣，入口鬆散，蒸過火有點濕爛，蝦爽帶咸，兩者合格。韮菜豬肉餃，試足五種風味五種醬汁，原味、浙醋、黃椒辣醬、豆瓣醬、辣椒油。餡料多肉少菜，更多韮菜會更多菜汁更好味。菜肉蒸餃，餡料好少，菜粒勁大粒，肉鬆得少少。炸雲吞，美女首先處理掉所有薄脆，雲吞餡留給我吧！豬肉咸鮮濕潤，滾滿甜酸汁不錯不錯。油炸鬼，少有的失手，咸香軟塾但不夠鬆脆。魚翅灌湯餃，造型好似卡通人物，笑死我！真係有魚翅，不是黃豆造的素翅，估您唔到！餡料豐富，帶子、蝦球、群翅、高湯，撈埋開胃浙醋不得了！百花釀魚肚，賣相慘不忍睹。魚肚爽實似豬皮，不綿不滑不多汁，蝦膠硬實味道陰沉。蒜蓉蒸排骨，瘦瘦的彈牙肉質，豬肉羶味突出。魚香茄子炆伊麵，上品無得揮無投訴！嚥韌乾爽彈牙完整伊麵，落味均勻清幽醬油香，撈著微辣肉鬆茄子，還有咸魚霉香，失控狂啜直到完全消滅！杏汁燉木瓜，即叫即做請耐心等候 20 分鐘，滾熱辣送上！木瓜清甜綿滑，杏汁清甜味獨特，拼埋美妙絕倫。…查看更多

三個幾星期美國勞役企足廿幾日無假放，返港一落地瞓個覺即帶著美女循上大陸按摩拉筋，先飲碗靚湯補補去先。嘆過翻尋味，美女想再嚐極品魚頭湯，順道嘆埋高質北京烤鴨！涼拌豬耳，軟骨脆脆帶膠彈豬皮，微辣而麻油香。雪菜毛豆，咸鮮脆脆十分開胃。北京烤鴨，平靚正超高質，至尊級享受！師傅帶著肥美靚烤鴨走到面前大顯身手，堂片烤鴨手起刀落出神入化，邊片邊散發烤肉飄香，兩下子就已完成排得美輪美奐整整齊齊吸引非常！脆脆胸片搭嫩嫩髀肉，多多肉啖啖肉塞滿嘴仔，極度幸福！讓薄餅捲著青瓜條鴨肉連皮，芥末才是精髓，提鮮提味無得頂！北京烤鴨，二食鴨鬆生菜包，捲生菜已足夠。醬油炒鴨肉鬆，精彩調味有鑊氣拼鮮爽生菜。二食鴨鬆鍋包。有趣脆卜卜的鍋包香噴噴，雖然食味一般，勝在特別。川芎白芷大魚頭湯，必飲堂煮魚頭湯，唔飲走寶喇！講北方語的大嬸廚師現場獻技，態度友善溫暖和譪可親。餚足超過 4 小時的特濃魚骨湯底，乳白色香氣撲鼻，黏厚漿嘴無比，鮮魚甜味強烈超凡，還散化陣陣酒香，慢慢品嚐舔舔脷！魚頭啖啖肉滑嘟嘟充滿骨膠原，魚三角、魚臉珠、魚雲、魚眼，全部都係寶！鮑汁炆雞腳，滋味濃鮑鮮蠔醬油汁，徹底滲透炆得黏膠帶爽。原粒蝦仁燒賣拼水晶蝦餃，兩者皆美妙，蝦鮮爽肉甜美。羊肉餡餅，非常有蒙古風味，質素超乎我想像！羶香肉香孜然香，醃味出眾混著豐富羊肉汁，彈彈羊肉碎被焦香微脆餅皮包著，食到停不下來！菜肉蒸餃，美女其中一樣指定菜色，不愛蒸餃的我都感到驚喜！嚥韌彈性餃皮包著鮮肉甜菜，配豆瓣醬或陳醋同樣可口，一啖一隻過足癮。炸雲吞，美女其中一樣必食菜色，不過只食薄脆雲吞皮，不食雲吞餡的，那就交我處理吧！咸咸濕濕的肉燥餡，沾滿咕嚕甜酸汁醒神醒胃。椒鹽排骨，何解會好食到停唔到口？炸得香口酥脆，肉甜有嚼勁，損骨頭都好味，越食越滋味。豉椒蒸鳳爪排骨，好肥的排骨油滴滴，完全被白色肥膏所佔據。鳳爪正常豉味蠔汁濃濃，皮爽肉滑。蜜汁叉燒腸，芫茜多得誇張，成碌都係綠色，應該寫香茜叉燒腸給食客識別，依家我半啖都食唔到呀！鮮蝦腸粉，爽爽蝦球，厚厚粉皮滑滑，淋上甜豉油食得下。…查看更多

酒後斷片 AI 暴走宵夜，燒鵝髀、桂魚粥、剁椒魚肚、等等等等，高質餐廳！實在太攰按摩時全程訓著，唔知有無按過，起身手痛腳痛，急急食個飯歸家休息。強國民踎係凳上，而且只用腳趾支撐著，他來至少林嗎？什麼名菜鮑魚啫貴飛雞？Abalone Chicken Wing Camp 什麼來的？蟲草花蒸水蛋，Chinese Caterpillar Fungus Flower Steamed Egg？石榴、龍眼、梨仔、車厘茄、哈蜜瓜，爽鮮嫩甜無得頂！叉燒餐包，細細的骰一口包剛剛好，餡少偏甜，包質軟塾味道還可以。螺頭雞湯，質高味濃鮮甜無可抗拒！紫米鮮蝦腸，賣相一流仲香到打冷震！最慘塊脆皮油淋淋味道混濁，用萬年油炸？蝦仁極咸，蝦仔迷你而筍粒多多，比以往差得多！招牌跳舞雞，新鮮出爐熱氣騰騰，原隻親手自撕才是皇道！烤雞香氣四溢連擊味蕾，食慾大增！重點出擊先來雞髀再來雞翼一扭一扯，雞汁鳳脂應聲激射噴出，香氣更香更濃！皮脆肉嫩，醃味無比可口，熱辣辣失控地狂噬！美味絕倫讚口不絕。再來多隻招牌跳舞雞，侍應問要斬件還是手撕，從來都唔會問真奇怪，我當然要手撕啦！竟然幫我撕埋，微溫不熱地送上，肯定係放涼先手撕，怕燙手就比返我自己撕，我要原隻熱辣辣企係度跳舞雞呢！脆皮而烤味芳香，焦香雞甜仍是美麗。蟲草花滑雞粥，好味道！橙紅色的粥液十分奪目，濃郁甜美到底如何做到？雖然雞件骨衫衫，但粥底異常美味，熱燙燙使得我失控灌入！天麻燉花膠仔湯，膠爽花膠桶，醇厚湯汁無可挑剔！水晶蝦餃，蝦仔搭著勁多筍，但美味依然，香港點心完全被比下去！醬皇金錢肚，彈到震騰胖而味道怪怪的，好重蘿蔔味啊！燒鵝髀，只得下髀不是全髀，迷你燒鵝？是鵝還是鴨完全分不清，皮脆肉嫩，醃味得而，原隻狂野地拿住咬扯滿足滿足！桂魚粥，粥底是靈魂所在，什麼配料都好食！滑嘟嘟白雪雪都的魚片充斥著鮮味，混著蔥花薄脆不停一啖又一啖地吞噬！剁椒蒸魚肚，咸辣非凡的味道，膠滑質地有著陣陣魚甜，開胃醒腦！剁椒蒸魚肚桂魚粥，創意融和，超然可口！甜咸辣香拍爛手掌。蟲草花燉老鴿湯，鴿肉味突出，雀仔的甜味泛濫，只能讚好！…查看更多

第一次帶您嘆世界享受一下，先食餐好再去按摩舒服一下。下午茶與美女撐枱腳二人前只不過嘆堂片北京填鴨、西芹炒鴨肉、堂煮川芎白芷大魚頭湯、鮑汁雞腳、炸雲吞、剁椒金錢肚、油條熱豆漿之麻！醃雲耳，沒什麼味道，食其爽脆。咸鴨掌，比雞腳更瘦無肉食，皮包骨過過口癮。滷水豬手，蠟燭明火滾住熱食，爽中帶黏的豬皮充滿骨膠原，皮下藏著啖啖肉，滷水入味清甜美味！鮮炸油條，使我驚嘆，使我對油炸鬼完全改觀！美女指定菜色，外層金黃微脆香噴噴，乾爽不油膩，內裡肉甜軟塾咸香好好味！超級香脆，外脆內綿，麵粉味香噴噴，香港食唔到。原味熱豆漿，無糖原味豆香更突出，白滑豆汁飲完再想飲，熱熱灌入非常暖胃。掉油條讓她浮沉一下，豆香咸香的碰撞更美妙！辣子雞，軟骨帶少少肉，味道蠻好但鑊氣不足，雞軟骨不夠香脆，乾身脆卜卜跟辣椒同吃較惹味。川芎白芍大魚頭湯，專程帶美女一嚐極品魚湯，當然讚口不絕，雙眼發光！堂煮靚湯！湯汁由深海魚魚骨餚足幾小時而成，魚味特濃得甜，鮮而不腥！加入新鮮肥美魚頭、米酒及藥材翻滾，完美無瑕！魚頭整隻都係寶，魚雲魚三角魚臉珠登滑嘟嘟啖啖肉，精華盡在魚眼中，不得了不得了！黏稠特濃魚湯烚菜格外爽嫩鮮甜！菜肉蒸餃，新鮮出爐飄著煙，溫柔的味道，簡單純樸，包得結實不散碎，菜甜肉香。齋鴨腎，非常神秘，似鴨肝似豆腐乾，有點滷水味。蝦餃拼燒賣，原粒蝦仁燒賣蒸到發脹濕濕般平凡。蝦餃蝦仁鮮爽甜，落味不錯蠻可口。炸雲吞，脆脆但有點油，有一點點燶，蝦餡鮮濃，沾上甜酸醬還可以。丹桂腸粉皇，以為什麼特別名物，原來只不過牛腸、叉腸、蝦腸放埋一碟。全部塞滿太多芫茜、芹菜、蔥花，我完全食唔到。鮑汁豬手，千里迢迢尋找川芎白芷大魚頭湯，誰知沽清！而且荷葉飯無、鮑汁鳳爪無、豆漿無、油條無！下次去到門口真係要問清楚，無魚頭湯飲不如唔好黎！剁椒金錢肚，普通醬皇金錢肚鋪上丁點剁椒。金錢肚唔辣微爽帶咸，食得過。蜜汁叉燒腸，完全食唔到，一腸一棵芫茜隊落去，芫茜味蓋過所有！豉椒蒸鳳爪排骨，開邊鳳爪一隻拼四粒排骨？排骨肥瘦適中肉甜滑漏。魚香茄子炆伊麵，無敵調味烹調最敝有蔥花要扣分！伊麵長長彈牙濃味可口，茄子濕滑食唔停口香辣。鮑汁雞腳，黏膠味濃香甜彈彈唔夠喉，明火鮑汁鳳爪膠滑黏濃味香甜好味。牛仔骨，肥膏一舊舊太肥味道合格，肉質鬆到極軟。北京烤鴨，醬料配菜除青瓜、大蔥、鴨醬外，還第 1 次見有菠蘿及芥辣，係香港從來未遇過，不知搭上填鴨味道如何。片皮鴨還未登陸就出薄餅，那麼會凍掉咯。$400 蚊超值超抵食，仲有片皮鴨二食添呢！京式刀法只片皮，只有極少量鴨肉黏附。勁香脆不油膩，比香港更高質，就連米芝連旺角明閣、沙田 18、尖沙咀南海一號都要收皮！第一次預上茄汁芥辣拼填鴨，芥辣原來好夾好好味，唯之驚嘆！皮脆肉嫩，多多肉多多醬少少薄皮，夫復何求。二食西芹鴨肉，鑊氣迫人熱騰騰，西芹爽甜無渣鮮甜，夾雜羶香鴨肉鴨皮無可抗拒！…查看更多

價目表寫住股法胸間索價 $300 蚊，到底什麼來的呢？自動感應換廁所板膠套？神奇地轉圈似乎好先進，是否轉來轉去都係同一張呢？凍檸樂，飲太多酒需要大量回魂曲！芝麻雞腳，瘦猛猛得層皮不肥美爽脆。陳醋海蔘，真係睇唔出係海蔘，似足雲耳呢！竟然食得過，爽彈滑酸酸甜甜。紫米鮮蝦腸，非食不可，必食推介！紫米腸粉皮程晶凝通透紫紅色，賣相吸引絕頂，捲住薄脆炸響鈴再包鮮蝦配上甜豉油，食得不亦樂乎！外層濕滑、中間鬆脆、裡面爽彈，超美味！鳳城水餃湯，包得大大隻結實不鬆弛，足料無欺場，爽脆木耳搭彈彈肉粒，意料之外食得過！炸鴨舌，乾爭爭脆卜卜，只有滷水肥美彈滑才好味。螺片蟲草花粥，依個好野必食！粥底已完全充滿蟲草花及螺片味道，清清甜甜，螺片鮮爽，不容錯過！蒜香蒸排骨，斬得的骰細細，趙得未夠滿足！肉甜滑滑，汁液油脂甘甜，蒜味突出。芝士牛肉球，堅覺得搞笑，好似有篤痰係舊牛肉球上面！結實黑黑的肉球，豉油味厚厚未算濁，味道配搭精妙。豉汁蒸鳳爪，醬汁清新和味，損腳趾皮爽肉彈。豬手湯麵，試一啖便夠！湯底啖如水，麵質腍劈劈，豬手搞到成碗湯麵油淋淋。豬手爽皮無肉，啜其味道吧。羅宋湯，點解大家突然要飲西湯，大家都好醉！特濃茄味，酸酸帶著蔬菜甜甜，全部清掉。台灣香腸，個樣似足臘腸！原來要收錢架，最初依為免費任食。味道似足沙樂美腸，雖然美味但大陸出品硬係唔多放心。鹽燒多春魚，凍食？幸好食落唔難食，大大條鬆化多肉香香。同樣依為免費小食，要收錢架！炸雞翼，黎個簡單助酒菜，炸得頗香，皮脆肉嫩。星洲炒米，朋友仔推介好好好食，唔食走寶！味道不過係普通炒米粉，唔香唔辣，咖哩味淡，顏色亦淡，味道食得過。燉豬肺湯，飲碗老火燉湯潤潤身體，湯汁濃郁，湯渣可口。銅盤茄子，茄子熱唔腍，而且個茄汁味道怪怪地。涼拌酸辣土豆絲，薯味清甜，微酸開胃。我較鍾意食熱炒土豆絲，依個太腍不爽脆。銅盤蒸雞，次次都係跳舞炸子雞，悶悶決定轉食蒸雞。蒸雞肉質非常嫩滑，落味得宜，味道滿意。係 VIP 房開餐硬係無坐係餐廳那麼美味，可能送到三樓房已經凍晒既關係。冰鎮芥蘭，首次遇到賣相搞笑冰鎮芥蘭，十足寒冬山頭，樹枝無晒樹葉。芥蘭爽脆清甜，純樸好味好味。眼前一枝枝插晒係冰度，始終一片片較吸引得多。茶樹菇炒雞腎，雞腎爽脆無得頂，最衰鑊氣不足！我唔食茶樹菇呢，有次打邊爐食過澀澀硬硬，之後一直抗拒。豉油皇炒鵝腸，入味爽彈嫩滑，唔夠熱唔夠鑊氣要扣分。東方園一品煲，房間最低銷費未夠數，唯有繼續點菜！其實依道菜色香味俱全，微暖搞到芡汁凝固一舊舊。煲底枝蠟燭仔並無點著，我地自已點吧！但因為太細支，完全唔夠力燒熱個煲。有蝦球、帶子、鮑片、海蔘、花膠，味道討好食得開心，如果用汁撈飯一定好好味。冬筍，辣辣地爽爽地濕濕地，有趣有趣！牛柳，過老全熟凍冰冰乾爭爭硬掘掘，超濃烈百里香味再加牛羶味，難食到不得了，放入口即吐！太陽蛋切雞湯麵，要橫誇 3 個部門先做好既湯麵，辛苦晒！粉麵檔先煮湯麵，燒味檔斬切雞，最後西餐攞隻太陽蛋。醒目識得跟埋辣椒醬、豉油、薑蓉！大陸所謂淮山麵還是生麵？湯底淡如水，唯有將所有辣椒醬、豉油、薑蓉混合，連湯帶汁及麵狂啜，微爽美妙！大陸雞真心高質，比香港還要好！皮滑肉嫩，雞汁清甜，鳳脂甘香。太陽蛋煎得非常美輪美奐，微溫滑嘟嘟蛋白，黏黏味濃蛋黃汁，最敝太油。鮑貝珍珠雞，食不到鮑貝既？咸蛋黃都無埋，肉餡得少少，好似食緊齋糯米卷。蘿蔔糕，比起香港酒樓快餐店更足料更香噴噴更惹味！蘿蔔甜混著叉燒蝦米臘肉。煎蛋雞扒湯即食麵，連出前一丁都無供應，求其大陸麵照食，最多狂撈豆瓣醬。雞扒鬆到腍劈劈，我都唔知食緊雞定豬，好采有塊雞皮可以認得出。都話要荷包蛋咯，比件熟蛋我，唔想浪費照食。麵質還可以，嚥嚥韌韌，味道跟以前食過既大陸麵一樣，白紙條味道，完全無蛋香無麵粉香。成碗最好食最新鮮係菜芯，堅好味！鮑汁炆雞腳，凍冰冰硬掘掘。雞中寶，還以為係雞腎雞肝，原來只係雞軟骨。脆卜卜油油，濃郁孜然味都幾咸。剁椒鱈魚腩，後腹鰭位，肥美膠彈但咸多過辣。蟲草花燉老鴿湯，穩陣之選！濃厚湯汁可口無比，鴿味螺味出眾，熱烘烘一飲而盡。…查看更多

臨按摩食飽飽，按摩完訓醒再食過，唔肥就奇啦 ﹗餐牌非常廣寬，包羅萬有各國美食，大家都已有共識，索價過百蚊都要再三考慮。零晨四點幾依舊無普通房，好采仲有間 VIP 豪華房，最低銷費 $3600 蚊 ﹗話知您最緊要有房，大家都好攰好醉喇。第一次見如此誇張巨大骨房，媲美酒店總統套房呢。間 VIP 房大廳包埋卡拉 ok 喎，歌仔新到您唔信，勁過 Neway 呀 ﹗VIP 豪華房除有 6 張按摩床、大廳卡拉 ok，仲有大大張飯檯係飯廳，張餐檯夠 12 個坐都仲要鬆動。餐檯上面盞巨形吊燈都非常典雅。大廳超級寬落，整間 VIP 房幾十人都無問題。有獨立廁所，但通風勁差，好嗅呀﹗第 1 次打大陸牌、第 1 次見自動麻將枱、第 1 次知道大陸牌得兩粒骰，幾有趣喎。大陸自動麻將機，見唔夠腳，連我都要落場頂位。點解副麻將會有幾隻顏色既？就係依個時候，出現 5 隻白板，笑到肚痛 ﹗唔記得影相留個記代添。原來比其他顧撈到亂晒，最後叫侍應執返排好喇。唔知道係咪因為 VIP 房距離餐廳都甚遠，所以每碟送到時已經放涼唔夠熱。巨形生果盤，到底依個果盤放左幾耐呢？會唔會翻用呢？晨早 5 點半食早餐，應該可以訓得舒服，雖然只係按摩椅，總好過要孖鋪既。花生，脆卜卜無油益，送下啤酒都好，估計全部小食都要收錢。腰果，比花生更脆更香口。臘腸，依個真係好好味﹗完全不會油淋淋，肉質嚥韌，肉味香甜濃郁。身處大陸食臘腸，硬係有點心理壓力 ﹗椒鹽多春魚，凍既？見侍應不斷補回，到底是否任食架？定每碟要收錢架？真心炸得出色，乾爽肥美多肉多春，地溝油美食？外皮羶香微脆，炸得金黃不油膩。而且魚肉嫩滑魚味濃，加埋脆卜卜甘甜春子，好好味呢。招牌跳舞雞，認住依隻雞，次次都叫依隻雞 ﹗超水準特別香口特別脆，深色的皮膚，必定烤得比以往耐比以往透徹。最敝唔夠熱，只微溫暖暖地，明顯烤完無立即上菜。香噴噴的脆皮一撕噴汁，閃令令的黃油，甘甜芬香，嫩嫩的體肉，綿綿的胸肉，雞味濃濃，醃味神秘而有層次，每條骨都被我損得乾乾淨淨。手撕招牌跳舞雞，訓低擘髀被手撕版 ﹗仍然外脆內嫩，薄薄的雞皮燒得金黃香脆，雞肉超級嫩滑而雞味濃，雞油甘香唔油膩。紫米鮮蝦粉腸，賣相一流亦好香，必食推介 ﹗大啖咬落去，外層濕潤嫩滑，裡面脆卜卜，蝦夠鮮爽 ﹗口感好得意，腸粉皮包住係炸腐皮？估計係捲著薄薄響鈴，滑嘟嘟紫米腸粉皮捲住香脆鬆化響鈴再包住鮮蝦配上甜豉油，外層濕滑、中間乾脆、裡面爽口，太好食無得頂﹗每餐必食﹗記得早前係房仔、大廳、餐廳食都係白色粉皮，依家係 VIP 房食終於竟然真係紫色粉皮喎﹗最外層紫米腸粉皮捲住薄薄響鈴再捲鮮爽鮮仁，非常乾爽香脆鬆化，而腸粉皮濕潤滑溜，口感豐富，開心滿足 ﹗蟲草花鮑片粥，雖然粥底較為普通，不過充滿蟲草花及鮑片味道，落足料無手軟 ﹗粥底清清甜甜，鮑片夠鮮爽好味道 ﹗鮑貝珍珠雞，食唔到鮑貝既？以前招牌必食，但眼前的強差人意。點解無咸蛋黃呢？即時扣分。咸蛋黃都無埋，肉餡只有一丁點，好似食緊齋糯米卷。色香味不過不失，印象中食過有咸蛋黃，莫非不是東方園？還是師傅加料？有咸蛋黃就更好食啦。星洲炒米，老友們不停話好好食唔食就走寶，即管試試。但味道似普通炒米粉，不過不失，沒怎樣驚喜。唔夠香唔夠辣唔夠咖哩味，淡黃色亦唔夠深，味道尚可。水晶蝦餃，滿分頂級高質好好好味呀 ﹗餃皮晶瑩剔透，蝦仁亦鮮亦爽，勁多甜筍，味道超然。薑蔥牛柏葉，熱騰騰極爽彈，薑蔥味香濃郁 ﹗無蒸過龍剛剛好，落味略咸還可以。蒜香蒸排骨，堅好味過香港酒樓，肥瘦適中無肥膏，骨少啖啖肉，香甜味美散發陣陣蒜味，但是否用地溝油先特別好味呢？鮑汁炆雞腳，有人鍾意食滑，有人鍾意食膠，我係後者鍾意膠膠黏黏的口感﹗鮑汁完全滲透雞腳之中，汁亦夠香夠濃，雞皮滑得黎帶點膠，啜得高興暢快 ﹗魚片粥，粥底淡如水，魚片鞋鞋兼多骨。樣樣都好好食，最差就係魚片粥。蔥油餅，由細到大都不太喜歡乾爭爭 ﹗烤餅味道，咬落散開有蔥油香。韮菜餃，意外將巨型韮菜餃成粒啪入，唔敢趙直接吞落肚﹗我由細到大都食唔到韮菜呢，聞到已經反胃想嘔，救命呀 ﹗白灼菜芯，非常大碌，幸好煮透徹夠熟夠腍，無草青味無生水味，鮮甜多汁。白銀菜豬肺湯，首次品嚐，同樣火喉十足，真材實料，菜香肺甜，香濃湯汁。水煮魚片，魚片腍劈劈藏著極多骨，不鮮不甜不嫩，跟香港川菜館完全兩回事。香港出品香辣帶麻彈牙嫩滑鮮味，但眼前依兜油感重不香不辣亦不麻，微暖不熱，試一次便夠。啫啫大腸煲，想食特別菜色，睇下大腸煲 ﹗吱吱喳喳鑊氣爆棚端上，油脂跳動香噴噴，夾起一堆大腸塞入，質感嚥韌帶滑帶彈，豬甜味濃，脂肪甘香，食得過。蒜蓉蒸勝瓜，朋友仔指定菜色，我都未食過。瓜甜水潤，清新的瓜味搭上濃郁蒜蓉豉油，夾埋清甜多汁娃娃菜，蠻不錯的演繹。炸乳鴿，外脆內嫩，微微肉汁食落不乾鞋，滷味得宜，合格。上湯雲吞，湯汁淡茂茂，不過雲吞蝦及肉夠咸，加上滑滑雲吞皮，整粒享用唔難食。豬什湯米線，最初想食河粉，無麵無粉無米粉，最後是但米線。除豬膶熟到乾鞋硬外，肉片軟綿綿，豬腸彈滑，清甜不羶，還算可以 ﹗我一向唔鍾意食米線，但點都試兩啖，驚喜地質感非常嚥韌彈牙滑溜，非讚不可﹗白灼生菜，簡簡單單清清地調劑一下，爽嫩添豉油，舒服健康。韮菜鍋貼，我以為係普通豬肉鍋貼，仲大大啖成舊掉入口，差點忍唔住嘔出黎 ﹗即時格硬成舊吞落肚，救命﹗我食唔到韮菜，韮菜好嗅呢 ﹗干蒸燒賣，其實點解要用錫紙兜載住？依家蒸得好濕，水滴滴完全唔係乾喎。蒸到爛溶溶爆開，賣相可怕慘不忍睹，味道質感就一般般。煎蘿蔔糕，膠感十足的蘿蔔膠 ﹗有蝦米臘肉味道，兩面焦香但未夠熱，如果有蘿蔔絲會更美味。燒腩仔，豬皮好假，應該係翻燒再翻燒，只為保持脆口但一咬即粉碎，而且肥騰騰油淋淋，味道不過不失。醬爆雞珍，重口味我鍾意，香口不濁不過咸，雞腎爽脆，雞膶略幹，整體可口的。龍骨湯，條龍骨在那？搵唔到既，溶掉了？燉湯火喉十足，清澈而濃郁的湯汁，堅好飲 ﹗蟲草花燉老鴿湯，依個湯飲過多次，都保持高水準好好味﹗鴿味濃而帶少少蟲草花香，飲完暖笠笠無投訴。啫啫蝦醬芥蘭煲，經常點既一味，蝦醬惹味香濃，芥蘭又清甜多汁，一清一濃味道剛剛好。我地問芥蘭道道菜都剩係莖，咁啲葉去晒邊呀？醬煮花蛤，超平呀 ﹗幾十蚊乍喎。花蛤都夠新鮮，係細仔又太瘦啫，還可以啦。燒腩仔，炒雞珍，龍骨湯，蟲草花燉老鴿湯，跳舞雞，啫啫蝦醬芥蘭煲，醬煮花蛤 ﹗食飽飽返香港喇 ﹗返到總部又食過，仲唔變肥仔 ﹗…查看更多

心情不爽，最好按摩。寂寞孤身跳制，斷片 AI 人工智能全開上路！爆操四日泰拳全身肌肉疲勞，無奈要休息兩日搵技師推拿推拿先得！水果區，任食水果，可以即叫即切。水立方沒有川芎白芷魚頭湯，失望啊！餐牌英文翻譯依舊有趣勁搞笑超讚，堅係等食既時候一大娛樂！滷水鵝腸 goose sausage，水晶清香雞 crystal chicken，實在真心太西利，笑那到肚痛！Cook 既過去式係無 ed 架，Frozen crab 雪藏蟹，係勁喎！Snow fish 鱈魚，天下無敵！涼拌黃帝菜 emperor cold dishes。大陸豪華骨場既點心出品真係一絕，雖然不甘心但無法抗拒。雞汁雲耳，色香味讚口不絕！雞汁特濃黏黏，充滿重奶味，雲耳爽脆。生醃蝦菇，膽粗粗第一次食生醃瀨尿蝦，亦係大陸第一次！個汁同螄蚶一樣架喎，酸酸甜甜勁蒜蓉，好食過生蝦刺身！點解大陸叫瀨尿蝦做蝦菇呢？香港食肆幾乎找不到的名菜！瀨尿蝦肉嫩爽中帶綿，濕潤味鮮，醃料濃濃酸甜出眾，啜得欲罷不能。滷水鵝件鵝肝鵝腎拼盤，滷水味結實，肝腎全熟有嚼勁，鵝背脊沒什麼肉但味道可以。黑椒鐵板小蘑菇，完全食唔到黑椒味？超濃蘑菇鮮味，爽彈滑多汁鮮菇甜。蟹油焗蒜香骨，食唔出有蟹油味，而且由點菜出菜送到上房已經唔熱，凍晒近乎室溫，幸好仍然香口帶肉汁，外層炸得非常鬆化，美妙食得過！荷塘月色，菜名美麗動聽，咩黎架？問服務員都唔知，太唔專業。照點黎試試。原來係蝦仁炒西芹粒蓮藕粒蓮子，非常清甜，啖啖爽脆多汁，味道非常清新，美味健康，最衰唔熱囉。太陽蛋餐肉麵，依位服務員四眼妹妹雖然識講廣東話，但似乎唔識寫字呢，落單周圍搵同事幫手，等左五六分鐘轉左個國語肥妹服務員，佢唔知咩係太陽蛋囉。我原本要太陽蛋公仔麵，依家變左太陽蛋餐肉麵，仲要加左生蔥，好嗅腥呀！好采煮得高質，麵條爽滑無太腍，蛋黃香濃，餐肉 油潤綿滑，菜芯勁爽甜鮮嫩呢！太陽蛋叉燒湯公仔麵，太陽蛋油淋淋浸湯食，叉燒乾硬，麵條微腍撈豆瓣醬尚算滿意。潮州炒粿條，左睇右睇，上望下望，都只係多蔥乾炒牛河黎喎！以我既認知及係香港食過，內內外外都不是如此！師傅求其乾炒牛河就算？夾晒所有牛肉鋪面，照張照相才試味。淡口無鑊氣，而且我最討厭生蔥的。牛腩撈麵，我係要牛腩炒麵送雞粥，唔係要撈麵架！幸運地柱侯牛腩鬆化軟腍，意想不到的入味可口！幼麵激爽有麵香，捲著牛腩迅間被我蒸發，驚喜萬分！皮蛋肉片粥，味道清清地，有肉甜幾好味喎。滑雞粥，雖然雞件骨杉杉無肉食，但粥底香甜綿滑味濃，撈埋蔥花胡椒粉更是香口。無可挑剔好好味！雖然雞件骨杉杉無肉食，但粥底香甜綿滑味濃，撈埋蔥花胡椒粉更是香口。撈埋薄脆添點口感更快活。印尼炒飯，夠香夠辣，炒得乾爽飽滿，拍手掌！配兩串牛肉及雞中翼，賣相骨子整齊，惹味香濃！外賣到房永遠唔夠熱，味道香氣大打折扣，要坐係餐廳堂食先感受到鑊氣。薑蔥牛柏葉，極爽彈掛著薑蔥厚芡，舔舔脷！小籠包，皮薄灌湯加肉碎，甜美食得過。生煎包，兩面金黃微脆香口帶點油，厚身飽皮散發麵粉香氣，肉鬆美味完成度極高。雜魚煲，其實魚仔才最鮮最甜最嫩！放好香料香口菜再饌湯略焗，鮮氣爆發！肉嫩魚甜，簡樸家鄉風味。蟹子燒賣，竟然一食就知係外購貨，同 7-11 叮叮點心味道及質地同出一轍。水晶蝦餃，跟港版高幾班，無得自欺欺人，不讚不可。晶凝通透餃皮，黏帶彈性，蝦仔爽甜，夾得天衣無縫，夫復何求。涼瓜鮑魚湯，甘甜雞湯味，滋陰補腎。彈滑鮮鮑有著涼瓜甘甜味道。橄欖燉角螺湯，得一隻乍？真材實料鮮螺味飛天，爽脆甜美，湯汁芫茜味霸道，卻飲得津津有味！…查看更多

迷失在神州！鬧情緒酒後孤單上路，do you know I miss you so much！即興爆醉單拖北上食個‪清晨五點‬早餐！點解羅湖過關不見港民通道既？只有外國民通道喎。原來閒日北上係超級爽，唔不用等不用迫，舒服寫意！沖個靚涼洗個靚頭嘆個宵夜再按按摩！自然醒睇陣電影台慢條斯理去沖個身，埋完單專車接送去過關回港，這才是生活！美中不足就係火車站比水客一喼二喼阻鬼住晒，激死我！東方棕泉翻新？變到好鬼酒店感覺非常唔習慣，我都係鍾意以前古色古香。後生仔服務員我係話要按腳，您比兩隻火龍果我想點呢？講完收走火龍果，但無幫我安排技師按腳，激死我！鮮菠蘿，淡口不甜不酸。番石榴，濃烈氣味香噴噴，但爽爽入口甜味清新不過份。檢查餐牌雖然菜色已更新，不過英文翻譯依然十分有趣，非常富娛樂性！清湯 Clear soup、鮮竹卷 Bean roll、野菌 Wild mushrooms，錯字 Cooked Almod。餐牌寫住原隻木瓜燉雪烚，雪烚？成隻雪蛤蚧燉真係好補喎。大媽技師有料到，雖然按到我死去活來痛不欲生飈晒冷汗，但按完後我兩隻腳筋腱即刻無再痛，好野喎！感激不盡。早前某次到訪，著火黑面一肚氣，我香港民好相與人品好，唔投訴已經寬宏大量！按摩大媽已經揼得馬虎求其，唔舒服兼整到我勁痛，要求加鐘又話眼瞓！都無緊要，唔想做就比您收工，直頭叫大媽提早半小時無需再按走吧！大膽到我比 $80 蚊小費厭少錢黑臉呱呱嘈！您個大陸婆真係貪得無厭黐膠線，比夠 $100 蚊您同我走！黑椒金錢肚，腍腍綿綿極入味，黑椒味濃香辣惹味，肉甜不羶。鮑汁鮮竹卷，唔講唔知係鮮竹卷，比一般短而粗。腐皮嚥韌索汁，肉蝦蔬菜加鮑汁美味。XO 醬炒蘿蔔糕，優質高香港幾班，蘿蔔味清甜混著瑤柱蝦米，兩面焦香，鬆軟入口爆出蘿蔔汁。黑椒牛仔骨，原來售價要 $30 蚊，剛剛知道那麼貴！不少白色肥高增添甘香但不能吞下，咬掉無事。瘦肉鬆軟，骨膜爽脆，黑椒微辣，牛脂油油還可以。水晶蝦餃，筍爽甜蝦鮮甜，皮嚥韌半通通，香醇味美。非常爽甜的蝦，微暖掉入可口無得彈。餃皮嚥韌，蝦鮮甜美，無位能夠扣分啊。魚翅灌湯餃，除仿翅外，仲有冬菇、乾瑤柱、鮑粒、蝦仔、帶子、蟹柳、肉鬆。味道複雜濃郁，老雞湯底醇香，打開湯餃加入浙酸啖啖肉啖啖湯送入，質高料多美味滿足！鮮蝦春卷，平平無奇，脆卜卜浸酸咪咪喼汁，蝦爽蒜蓉味濃。滑雞粥，真心好香濃雞味，到底是否純天然無添加架？雖然不算綿滑，但雞味濃加上榨菜咸辣青蔥清香味道，食落更豐富更多姿多彩！食唔停口一滴不漏，好味道！石鍋豆腐，新產品鮑汁麵醬勁美味無得頂，忍唔住要叫個白飯撈黎食！滾熱辣起晒泡颷著煙，有滑豆腐、肉鬆、蝦仁、帶子粒、炸菜，味道有點似魚香茄子。花膠黑豚肉煲，烹調非凡出色，使我讚嘆不已！大量薑蔥蒜頭爆到香噴噴，豚肉入味彈牙有咬口，花膠滑中帶爽，拼得天衣無縫！黃金海岸翅，食完才記起以前享受過，質素依然不變。南瓜高湯底，清香不甜不濁，黏黏熱辣辣灌得痛快！叉雞湯麵，忍真低於水平，不想浪費食物格硬倒落肚。淡如水的清湯搭無味廉價大陸全蛋麵，加入豆瓣醬都無補於事。雞件骨衫衫，肉多骨少乾鞋兼備，叉燒硬掘掘不甜美。原粒蝦仁燒賣，蝦仔生猛到跳出黎喎！豬肉甜味清醇濕濕欲滴，蝦仁半爽帶彈，鮮味輕飄，大大粒啪入融合攻擊，拍手叫好！生煎包，餡料太少，不過熱辣辣外層焦香，裡面軟塾，麵包好香甜。糯米雞，輕輕爆烈滲出陣陣荷香！不知道裡面收埋什麼。緊張地溫柔拆開，驚見咸蛋黃！立即整條塞入，甜甜黏濕糯米飯散發咸香，還有肉鬆提味，格外好食！豉汁蒸排骨，勁肥大量肥膏油滴滴，潤澤我雙唇。肥膏多瘦肉少，油感太重試不清味道。辣子雞，感覺正宗，但什麼是正宗？雞件連骨斬得碎碎，炸到完全透徹，深入骨頭之中，連骨食乾乾香辣刺激脆卜卜，夾住大紅袍辣椒同吃更加變態！豉椒排骨飯，即煲排骨飯要耐心等候，十幾廿分鐘熱熱送到！飯粒細細瘦長，勁濕勁爛而黐牙！排骨勁咸帶濁，豆豉味極重，骨多肉少勁細舊！豉油皇炒麵，我不吃蔥段、芽菜及洋蔥，全部走掉。豉油香撲面而來，鑊氣迫人！乾爽彈牙嚥韌，生老抽調得吸引，撈粥更加精彩絕倫。砂鍋煲仔翅 2 兩，剛滾起一刻剛剛火焰同時熄滅，師傅利害到一早已計算在內嗎？芽菜爽甜，花膠排翅針足料索索聲，湯底膠黏厚美味無窮，醋都不需要。潮州粉果，餡料塞得滿滿結實，沒有空盪盪感覺。有八角味有蔥有葛，但我竟然不單止不討厭還蠻喜歡喎！濃味蝦米同肉鬆夠香口。果皮半透不油而嚥韌，內外合壁比大埔新明發更好食！一品米網海皇腸，各拖各法，各有命名，其實同出一轍。紫米鮮蝦腸、響鈴蝦腸、鬼馬蝦腸！有芫茜既？幸好已被脆炸響鈴及鹹豉油完全淹沒。腸皮滑、響鈴脆、蝦鮮爽，最衰係落太多豉油過鹹了！灌湯小籠包，樣子古怪賣相嚇人，不過味道唔錯食得下。有湯汁有肉甜，皮厚但富彈性得分。無可能跟上海菜館比，而點心的角度評級，美味可口合格。香甜的豬肉浸在滿滿的湯汁，整粒入口一咬爆開，雖然皮真的厚了一點點，但味道仍然無可抗拒，食得津津有味。蟹子燒賣，肉球結實到如此地步，生前有玩健身的嗎？十分有咬口極彈，每口充滿肉汁，水潤無比，豬肉味特濃，食得齒頰留香。回港過關眼測最少有成 95% 係走州民通道入境，特衰政府夠膽死話絕大部份水客係港民？香港係神州一部份？回歸廿年都仲係要用漫遊上網、要用 IDD 打電話、過關行外國人通道！…查看更多

有趣的打咭熱點，少女夢？絕大部份顧客都係女仕，由青春少艾到老成持重都有，神州美女比比皆是，搞到我對眼既忙且攰。兩層的唐樓，有不同的主題房，亦有簡陋的裝潢及擺設。神州網紅熱點？內外參觀一下，遇上不少美少女在拍照自娛呢。打咭影相熱點 Ih Cafe 大量青春美少女，睇到流晒口水！深圳一日遊，海洋世界 = Ih Cafe = 蛇口港 = 福田 = 重慶爽翻天老火鍋 = 東方棕泉。朝早 10 點宿醉出發，到黃昏 6 點半終於走剩兩個景點。粉紅慕絲蛋糕，美少女戰士蛋糕，有色無味，外層膠膠的質地，裡面鞋鞋海棉，拍照的道具。海藍慕絲蛋糕，美人魚蛋糕，除顏色跟美少女蛋糕唔同，食落味道幾乎一樣。卡通及色彩繽紛的造型蠻可愛，真係只為拍照打咭，味道不願致評，未食過這麼硬的慕絲囉！朱古力曲奇奶昔、士多啤梨月奶昔，除了糖水及淡忌廉味外，飲不到其他味道。Dirty coffee，髒咖啡？裝咖啡？機本上沒有甜味沒有咖啡味，清淡如水，稀得出奇像咖啡水，有微弱淡忌廉味，連同曲奇碎及咖啡粉入口，終於有少少味道。…查看更多

飲到醉芬芬，再凂浩浩蕩蕩全去深圳！樣樣都新束束又乾淨企理，裝修好前衛適合後生仔。凍咖啡，樽裝？奶水糖水，濕濕口算吧！飲啤酒啦。燒鵝湯拉麵，居然只淨一客？多謝史提芬讓比我食，感謝。整體唔難食，不過燒味配大陸拉麵怪怪地。整個湯同拉麵跟街買既即食拉麵一模一樣，白色大陸拉麵係沒半點蛋味，口感嚥韌。燒鵝有 4 件，油粗乾淡悶，味道質地免強合格。花膠灌湯餃，平平無奇，單調無咩特別。細細塊花膠片普普通通，有蝦仔有豬肉鬆，香彈冬菇配碟，雞湯帶醬油味，不過不失。滷水豬手，質地夠膠夠黏，有皮食無肉食，不過滷汁略咸。牛肉生煎包，好好味呀！食完一隻又一隻，仲想叫多份啊！牛肉醬餡充滿洋蔥甜味，跟濕潤牛肉載得滿滿！極香口美味，襯上軟墊麵包，兩面焦香，食得津津有味！食飽飽大爺般攤係大廳梳化休息，爽乎！最衰時間緊迫，聽朝要晨早過關回港返工，依家已經兩點幾喇！發現真係唔催係無服務員理您，話知您坐係度發呆坐天光！三催四催終於入到房喇！…查看更多

史茶？排長龍，好采已用 Apps 落單，還要再等多 15-30 分鐘，到附近到處逛逛。整間舖沖漬 BB 奶羶味，受不了！再加上隔離係滷水店，我只聞到滷水 BB 奶羶味，更難頂！純四季春，跟茉香綠茶一模一樣味，絲毫無分別，不覺有什麼特別。見職員們在水吧內衝上衝落左串右插，真的那麼好生意？還是羊群心理？另外三款奶蓋，本人真的不懂欣賞，如果不攪拌直接飲，最後奶蓋黏稠基本上啜不到。如果攪拌飲似十足芝士水希希的，併茶味併果味，真的不知道好飲在那裡？…查看更多

依個旅程真係學到好多野，極多新奇有趣事物，大開眼界大飽口福！第一次走到偏遠南山區，估唔到遠離羅湖、皇崗後，行得舒服食得自在呢！對深圳既印象完全改觀。疑似女老闆由我地落車已笑容滿面，熱情開朗地招呼，受寵若驚啊！還落力替我地拍照，問問食物質素如何，埋單後還連聲多謝，其他侍應妹妹都非常殷勤友善，對於神州既服務態度真係刮目相看。奇怪地沒有一位侍應小姐懂廣東話呢，有點失望。發覺此餐廳很多員工喎，廚房十幾個，樓面六七個，可能舖租平人工平，真羨慕如此營商環境。將蚊蟲作碗碟圖案，大家都感到驚訝食得不自然不舒服。有朋友決定要求換碟，有朋友用食物掩蓋當睇唔到。環顧四週地方寬敞，光亮整潔，空氣通爽清新，全部都係我始料不及的。檢視餐單，包羅萬有，大量特色創意點心，使我目不暇及，款款想試啊！非常精緻美輪美奐的巧手點心，獨特富創意！大家都非常認真地點菜，絕對不能有絲毫閃失，而錯過美點佳餚。決定金奬乳鴿、胭脂賽螃蟹餃、蟹肉啤梨粿、肉鬆香酥餅、金牌蘿蔔糕、播椒茄子、貴妃醉蝦、蜜汁雞中翅、小財豬布丁、象棋流沙包、五點聚聚！胭脂賽螃蟹餃，鮮紅色奪目耀眼，紅菜頭淡淡甜味，用嚥韌透明餃皮包著，味道平凡舒服，試試無妨。象棋流沙包，觸感暖笠笠不捨得放下，愛不釋手。流心滴滴熱騰騰，咸蛋味特濃有點咸但好味道。麵包不夠軟塾似足曼頭，食完一隻已飽飽好滯。貴妃醉蝦，無去蝦腸趙到索索聲喎。酒醇不嗆不澀，清香入味。青花椒？生椒嗎？陣陣花椒辛味。蝦爽彈彈優質，蝦頭無膏帶腥味，千奇千奇千奇唔好啜啊！蟹肉啤梨粿，咬幾啖始終一滴蟹味都無喎，完全係蘑菇餡。外層質感跟咸水角一模一樣，嚥嚥韌韌十分油膩。肉鬆香酥餅，緊香口呢！全部料都乾乾的，欠缺肉汁甜美。金奬乳鴿，真幼齒乳鴿！不是香港大多數食市提供的中年鴿。師傅誠意十足無偷懶，眼測色澤鮮明奪目，金黃平均。薄薄一層光油留在表面不油膩，必定係慢慢續殼殼滾油拖熟而成，不會是馬虎掉到炸自生自滅浮浮沉沉，計時撈起出貨！嬸嬸親自用鉸剪溫柔地將乳鴿在食客前一分為二，聲稱不能用大刀劈開，肉汁油份飛射流失架，浪費兼影響味道。皮脆肉嫩不在話下，緊緻滑滑鴿皮，不會縐不會韌，完美地包著嫩肉。髀肉彈彈，胸肉嚼勁，陣陣清香醃味，連骨頭都損得乾乾淨淨！那有不好吃的理由，實在太美味，要叫多隻分甘同味！金牌蘿蔔糕，巨形蘿蔔球，表面炸得酥香無比，內藏軟綿綿清甜蘿蔔肉，跟味道像葡汁的芡齊齊享用。色香味俱備，簡單食材化腐朽為神奇！蜜汁雞中翼，炸得通透的雞翼兜個蜜糖罷了，堅硬的雞皮包著微濕白肉，平庸免強唔難食。五點聚聚，胭脂賽螃蟹餃剛才食過。奶黃流沙包跟象棋流沙包一模一樣，只係無吸印既分別。薑汁紅棗糕，濕潤黏膠清甜可口不膩。墨魚汁餃及柚子蝦餃，都係普通蝦餃，餃皮韌硬，沒有墨汁味沒有柚子味，外觀贏晒但味道平平。可口可樂，室溫大陸可樂，味道陰沉，汽少而糖精味強烈偏甜，來個冰底舒服順喉得多。小財豬布丁，好可愛震騰騰布甸，即刻諗起沙皮狗蛋糕被斬頭驚嚇畫面短片。彈力霸道，震騰騰好搞笑，彈得黎夠結實！對我而言係極甜的味道，我不愛甜的！已甜到分不清楚是什麼味道，粉紅色係士多啤梨掛。三后一皇難得聚頭，食好野大快朵頤。朋友係要見既，有幸旅程有您地。食完個靚靚午餐，大滿足！緊接下一站喜茶。深圳一日遊，落馬洲啓程，福田的士、南山、海岸城午飯、后海下午茶、蛇口港地鐵、水圍晚飯按摩、皇崗回港，悠悠閒閒小探神州。大型商場改變很多，高級超市服務多原化，沒有招牌的食店，長知識之旅。…查看更多

深圳一日遊，朝早 10 點宿醉出發，到黃昏 6 點半終於走剩兩個景點喇！海洋世界、Ih Cafe、蛇口港、福田、重慶爽翻天老火鍋，平靚正抵食好味道！食飽飽去埋東方棕泉按摩就可以返香港喇。朝十晚一攰過返工，零晨兩點終於踏入家門。變臉表演，師傅落裝帶返副眼鏡，佢咪剛才門口著便服帶位既？莫非係老闆技癢？菜牌極大，食材極多，包羅萬象，珍禽異獸，珍饌百味，罕見食材，最愛內臟，到底要幫襯多少次才可以試得完啊！除大量生料外，連前菜熟食也不少，您叫貪吃的我如何是好？食用植物調和油，講到好似行交配用品一樣，陰陽調和油？免燙傷、免熱氣、提鮮、提味，那麼利害？梗係要試試啦。鴛鴦鍋，藥膳清湯併麻辣湯中辣。廚房師傅親自端上乾鍋，所有麻辣湯材料而在內，再由侍應倒下辣湯膽，大家耐心等候滾開。千百樣香粒混成，大量辣椒還有牛油，香噴噴口水流，多層次的辣度，豐富複雜神秘，越食越想食。藥膳清湯，只有中間樽仔，堅夠清淡，沒怎樣味道。功夫牛肝，師傅刀功已經練到天外飛仙境界，切到薄過紙半透明。我極喜歡的牛肝，能食到的食肆少之又少，有緣才能遇上。先跟生雞蛋撈混，用筷子夾著特薄肝片，在滾滾靚湯中輕拖兩回，得左！淡淡紅色不能過火變成灰色，太熟乾硬不好吃！特濃香醇甘甜的膶味，半爽脆半嚥韌，肝汁飄香，餘韻無窮。牛胸油，太多命名，如牛白肉、牛胸爽、牛心鼎，都係同一個部位。牛脂甘甜到天涯海角，爽脆油潤搶住食，客氣生疏食少好多，我梗係唔客氣啦。脆鯇魚片，異常地極多骨，跟香港刀法不同？還是大陸州民連骨吞的呢？瘦瘦鞋鞋味淡沒有鮮味，雪藏貨嗎？精品鵝腸，不止是精品，簡直是極品！係香港從未睇過如此處理。低溫冰鎮立即掉入滾滾濃中，冷縮熱脹，溫度的大反差，灼灼即縮即起，只是斬眼兩秒間的事。超強爽脆索索索，每趙都釋出甜美鵝腸汁，使我讚嘆不已。海白菜，跟我幻想的白菜模樣沒半點像樣，送到都唔知係海白菜，似足水藻類。食落半脆像海蜇，半腍像絲瓜，輕輕海藻的清新味道。基圍蝦，游水生猛腳撐撐有如萬馬奔騰，不如您地一齊上路有個照應吧！全部掉到熱湯中潛潛水，目不轉睛約 30 秒起菜。充滿甘甜蝦膏，蝦爽彈鮮甜無得頂！皇帝菜，都比香港新鮮爽嫩得多，獨特的菜甜味齒頰留香。鴨血，必定要配上麻辣湯才能發揮所長，還要耐心等候慢慢炆煮，讓她吸收麻辣湯透徹才能變得彈滑爆汁！厚薄完美，經過段時間浮沉，完成度超高！一二三四五不停吞下，怪您過份美味！鮮腦花，跟麻辣湯天作之合的伴侶，不要烚過火，要保持其比豆腐更嬌嫩的身軀。被麻辣湯染得鮮紅，不要害羞狠狠咬啖！蛋白味醇香不羶，黏黏漿漿的質感更是吸引。黑毛雪花肥牛，還算合格的味道，少少乳香微微牛甜，嫩嫩滑滑，唯獨太薄口感有點削。深海八爪魚，深層雪藏八爪魚，沒有一點味道，一絲鮮味也沒有，一絲八爪魚味也沒有！韌到痴線，趙到我牙骹軟。撒尿牛丸，瀨尿牛丸？真的有瀨尿蝦肉釀在內嗎？根本唔係食神既瀨尿牛丸，只不過係餃子釀牛丸，想講爆漿牛丸嗎？其實係普通包心丸會射汁之麻。鞋烚烚的豬內鬆，無味湯汁，韌韌牛丸殼，滾滿麻辣豉油掉落口算吧。…查看更多

依個 trip 真係學到好多野，好多新奇有趣事物，大開眼界大飽眼福！第一次走到南山區，估唔到遠離羅湖、皇崗後，行得舒服食得自在呢！深圳一日遊，落馬洲 = 福田 = 南山 = 海岸城 = 后海 = 蛇口港 = 水圍 = 皇崗，悠悠閒閒小探神州。大型商場改變很多，高級超市服務多原化，沒有招牌的食店，長知識之旅！連麵包都那麼精美，呎碼巨形！比香港大三倍但價錢相約。大量神州美女前來買包買茶食甜品，美女如雲性感美麗，青春無敵目不暇給！…查看更多

從來唔知有水景雲天當然未黎過啦，試試都好。內籠裝修好似已有多年歷史喎，感覺有點舊。個場都有點細有點侷促，沐浴間都係比較舊式，而且處處燈光都非常暗淡，慳電嗎？連餐廳都唔開燈咁得意？宵夜早餐時間，餐廳黑媽媽勁搞笑，可否點幾支蠟燭比我呢？好多燉湯飲啊，太感動喇。雷史昌三人行食少少夠喇，石斛燉響螺茶壼湯、珍珠雞、湛江滑雞粥走蔥、豉汁雞腳、排骨蒸陳村粉、涼瓜黃豆燉鮑魚仔茶壼湯、蝦餃、燒賣、豉汁蒸排骨、春卷。涼瓜黃豆燉鮑魚仔茶壼湯，頭幾啖好好味，散發著甘甜味道，之後有點濁有點渴有點膩。鮑魚仔鮮甜彈牙，仲有少少苦瓜味道。珍珠雞，熱辣辣香噴噴，荷香飄飄。又會那麼好味？比香港一般酒樓好食百倍 ﹗糯米嚥韌黏黏又鬆軟，啡色係咩餡黎架？香氣宜人，併上肉鬆醬汁，每款餡料都甜美可口，不過食完有點渴。排骨蒸陳村粉，我第一次食，一向我只會食淨蒸排骨呢。其實不是什麼特別的點心，只不過係豉汁蒸排骨加陳村粉底，但排骨肉汁欠棒，使到陳村粉都好乾又無味呢。排骨骨多肉少，斬到細細舊，肉汁都蒸發左喇，味道還可以。水晶蝦餃，see through 半透明，皮薄白裡透紅甚是誘惑，忍不住一啖吞落肚。好熱呀 ﹗蝦爽鮮甜，餃皮滑而彈彈，高質。蟹籽燒賣，樸實不華，不肥不膩，瘦肉多而肥豬肉少，包得結實不鬆散，肉汁保存在內，整粒掉入口，一咬水潤肉味強烈正到痺 ﹗還散發淡淡蟹籽香氣。鮮蝦春卷，不是即炸，凍的。掉進喼汁打滾，酸咪咪易入口，香脆又食得到蝦肉，滿意。…查看更多