Item: 水立方國際水療會
Rating: 4
Author: 奧志雷

奧志雷

等級3

2016-06-15

酒吧巧遇朋友仔，爆醉齊齊北上按摩！第一次去如此大場按摩，第一次親臨水立方，非常寬敞啊 ﹗裝修得富麗堂皇，服務、衛生及環璄都十分滿意。

按摩到朝早九點幾先瞓覺，十一點左右就醒左喇，等埋朋友們兩點幾先去食野。侍應全部講國語，一開始就比份鮑蔘翅肚大 menu 我地，嚇鬼咩 ﹗我地食早餐之麻，點食到咁 heavy 喎，侍應仲話朝早十一點點心已停止供應，酒樓點心會停架咩？激死 ﹗

至尊鮑魚成千蚊人仔隻，真睇得起我地，哈哈 ﹗早餐仲未富貴到食鮑魚囉。真係鮑蔘翅肚喎，除左鮑魚，仲有海蔘、魚翅，雖然好吸引又好想食，但唔係依家囉。

Order 鐵觀音嘆啖茶醒醒去先，但完全無味既，非常淡口，好似用青葉沖既味道，毫無茶香，可能要再泡耐一點。石斟燉水鴨湯，水鴨連骨都燉到腍晒，成舊連肉連骨全部食晒，湯汁香濃甜美，火喉十足，好好味無投訴。

揚州炒飯，賣都好滿意，但無蛋香而且鑊氣欠奉 ﹗落生蔥粒陣味太勁，白蔥太多，唔係咁食得到。唯有撈個瑤柱瓜甫一齊食，免強入到口，依個配搭又幾好食喎。見個 menu 得一兩款炒飯，但無瑤柱蛋白炒飯。問侍應妹妹有咩好介紹又唔知道，求其揚州炒飯，都估到會係用火腿粒，唔係叉燒粒，意料中事。

川芎白芷魚頭湯走芫茜蔥，我超級鍾意飲依個湯，發現有供應，一定要啦。大魚頭真係勁大隻，新鮮嫩滑啖啖肉 ﹗臉珠登正、魚三角正、魚雲都都正，啜唔停口 ﹗藥材味道香濃不濁不澀，跟鮮魚味道非常配合，各自精采 ﹗物超所值，湯汁香濃味美，又平又好食 ﹗

銅盤蒸雞，點樣睇依個都係銀色銻盤，何來銅盤？似層相識，原來即係金針雲耳冬菇蒸雞啊，依味餸我都好鍾意食，但千奇唔好蒸到過晒火又乾又鞋囉。朋友仔突然思家病發想食住家蒸餸，當然無問題啦！

份量夠多，味道都滿意，冬菇雲耳都好食。超級濃郁鮮雞味，竟然用上新鮮走地雞，您係勁既 ﹗大陸走地雞真係特別好食，最好食都係大陸雞，香港雞輸九條街。半肥瘦雞肉不油膩無肥膏，薄薄雞皮嫩滑無比，肉質滑溜結實彈牙，雞味香濃，天然雞甜味呀 ﹗好耐食試過喇，極品。

瑤柱扒瓜甫，芡汁深橙色閃令令，落左咩呢？香氣十足，味道都甚為滿意，但瑤柱細到機乎睇唔到，放大鏡唔該，應該只係迷你乾貝柱囉。雞湯味重，蓋過瑤柱味道。節瓜燴得又腍又棉，餵得透徹充滿水份，沾上大量瑤柱芡同吃，美味。

啫啫魚扣煲，魚扣勁香勁爽脆，醬汁甜美好味道！吱吱聲上菜好氣勢，出晒煙又香噴噴！大量香菜同蒜頭，香到不得了！將香菜、蒜子跟配料全部兜混，炒兩野，等一等，食得！咁大個仔我都係第一次原粒蒜頭食，原來熟透既蒜頭係又爽又香甜架，完全無辛辣味道，好好食呢！

下午三點既早餐完滿結束，川芎白芷魚頭湯、石斟燉水鴨湯、銅盤蒸雞、瑤柱扒瓜甫、揚州炒飯、啫啫魚扣煲，三男一女居然食唔晒，真係好少可，最衰我唔夠瞓搞到狀態大跌啦。食飽飽攬住個大肚腩返香港，美味食府，環境乾淨舒服，賓至如歸，行去落馬州火車站只係 5 分鐘，夠晒方便，第一次的水立方好快再 encore ﹗